Kúni keshege deıin ınternet-dúkender kıim-keshek pen turmystyq tehnıkany jetkizýmen ǵana shekteletin. Endi bul sheńberdiń keńeıip, onlaın saýda alańdarynyń deńgeıi múlde jańa satyǵa kóterilip otyrǵany baıqalady. Atap aıtqanda, TMD elderindegi iri marketpleısterdiń biri – Wildberries jyljymaıtyn múlik naryǵyna qadam baspaq. Iаǵnı, endi ınternet arqyly páter de satyp alýǵa bolady, dep jazady Egemen.kz.
Bul jóninde atalǵan kompanııanyń negizin qalaýshy Tatıana Kım TASS agenttigine bergen suhbatynda málim etti. Onyń aıtýynsha, qazirgi tańda Wildberries eki birdeı qurylys kompanııasymen seriktestik ornatý jóninde kelissózder júrgizip jatyr. Bul kelisimder nátıjesinde platformada turǵyn úı satyp alý-satý qyzmetin testilik rejımde iske qosý kózdelgen.
«Biz árdaıym taýar sanattaryn keńeıtip otyramyz. Qazirdiń ózinde eki iri qurylys jobasymen áriptestik máselesin talqylap jatyrmyz. Jaqyn bolashaqta páter saýdasyn iske qosyp kórýdi josparlap otyrmyz», deıdi Tatıana Kım.
Aıta ketý kerek, buǵan deıin de Wildberries platformasy qyzmet aıasyn edáýir keńeıtken bolatyn. Máselen, sońǵy jyldary munda saıajaı men monsha satý qyzmeti iske qosylyp, 2024 jyldan bastap kólik bólshekteri de saýdalanyp keledi. Endi bul qatarǵa jyljymaıtyn múlik, ıaǵnı turǵyn úı de qosylmaq.
Jańa fýnksııanyń naqty qaı elderde qoljetimdi bolatyny ázirge belgisiz. Alaıda Wildberries-tiń geografııalyq aýqymy jyldan jylǵa keńeıip kele jatqany baıqalady: Reseı men Qazaqstannan bólek, kompanııa Belarýs, Armenııa, Qyrǵyzstan, О́zbekstan jáne Izraıl elderinde de qyzmet kórsetip keledi.
Bıyl Almatyda Wildberries-tiń logıstıkalyq haby ashylmaq. Budan bólek, taǵy bir iri reseılik marketpleıs – Ozon elimizde kólik-logıstıkalyq ortalyq qurýdy josparlap otyr. Bul úrdister ınternet-saýda salasynyń tek turmystyq tutyný zattarymen shektelip qalmaı, endigi jerde ekonomıkanyń jańa baǵyttaryna den qoıyp otyrǵanyn ańǵartady.
Sarapshylardyń paıymdaýynsha, sıfrlyq saýdanyń aýqymdy ekojúıege aınalýy – naryq qurylymyndaǵy eleýli ózgeristerdiń bastamasy ǵana. Bul jańa betburys turǵyn úı naryǵy men qurylys sektoryna da serpin berýi yqtımal.