Ertis-Baıan óńirinde bıylǵy jaz erekshe ystyq. Aptap ystyqta qala turǵyndary sýburqaqtardy jaǵalap, saıa tabady. Oblys ortalyǵynda kommýnaldyq 22 sýburqaq ornalasqan. Qala ákimdiginiń málimetinshe, olardyń 50%-dan astamy 15 jyl buryn salynǵan.
Sýburqaq tostaǵandarynyń negizgi qaptaý bóligine aǵymdaǵy jóndeý júrgizý qajet. Olardyń jabdyqtary jyl saıyn maýsym aıaqtalǵannan keıin qalpyna keltiriledi, isten shyqqandary jańasymen aýystyrylady.
– 22 sýburqaqtyń úsheýi 5 jyldan az ýaqyt buryn salynǵan («Máshhúr Júsip» meshiti, «Iý. Gagarın atyndaǵy saıabaq», Metallýrgter saıabaǵy), 4 sýburqaqta jabdyqtar men qaptama plıtkalardy aýystyrý jumystary júrgizildi. Qazirgi zamanǵy dızaınmen bezendirilgen 3 qurǵaq sýburqaq jumys isteıdi. Estetıkalyq tartymdylyǵynan bólek, barlyq sýburqaq shahar ekologııasyn jaqsartýǵa da qyzmet etedi. Ásirese qurǵaq klımat jaǵdaıynda aýany ylǵaldandyrýǵa kómektesedi, jazdyń ystyq kúnderi salqyndatý áserin qamtamasyz ete alady, – deıdi ákimdiktiń abattandyrý sektorynyń meńgerýshisi Álibek Orazalın.
Nysandardy kútip ustaýǵa, aǵymdaǵy jóndeýge bıyl 76 mln teńge bólingen. Qarajat árbir sýburqaqtaǵy operatorlardyń jalaqysyna, sýburqaqtardy jınaýdyń hımııalyq quraldary men sý berý-aǵyzý kommýnaldyq shyǵyndaryna, aǵymdaǵy jóndeýge, qaptama plıtkalaryn, isten shyqqan sorǵylardy aýystyrýǵa, ózge shyǵys materıaldaryna jumsalady.
Ákimdik ókilderi sýburqaq aınalasynda serýendep júrgen turǵyndardan turmystyq qoqystardy laqtyrmaýdy suraıdy. Baqylaýsyz qalǵan balalar sýburqaqqa shomylyp jatatyn jaǵdaılar jıi kezdesedi. Negizi sýburqaqtaǵy sýǵa túsýge qatań tyıym salynǵan. Sondyqtan jaz mezgilinde ata-analar buǵan erekshe nazar aýdarǵany jón.
Pavlodar oblysy