«Zańdy saqta – tártip ornaıdy» – bul qaǵıdatty tek uran retinde emes, ómirlik ustanym etip alǵan aýyl bar. Ol Aqmola oblysy, Atbasar aýdanyna qarasty Shýıskoe aýyly. Sońǵy úsh jyldyń ishinde bul eldi mekende birde-bir qylmys tirkelmegen. Sonymen qatar, ákimshilik quqyqbuzýshylyqtar sany da jyldan jylǵa tómendegen. Mundaı kórsetkishke aýyl halqynyń ózara syılastyǵy men tártipke degen talapshyldyǵy sebep bolyp otyr, dep jazady Egemen.kz.
Aýyldaǵy qoǵamdyq tártiptiń saqtalýyna jergilikti aqsaqaldar keńesi belsendi úles qosyp keledi. Atap aıtqanda, aýyl aqsaqaly Erkebaı Baıjigitov kóp jyldan beri qoǵamdyq máselelerge belsene aralasyp, jastarǵa úlgi kórsetip keledi. Ol eńbek jolyn osy aýylda bastap, túrli salada jumys istegen tájirıbeli azamat. Búginde qoǵamdyq sana men quqyqtyq mádenıetti qalyptastyrýǵa óz úlesin qosyp otyr.
Qoǵamdyq tártipti qamtamasyz etýge belsendi atsalysyp, kópke úlgi kórsetkeni úshin Erkebaı Baıjigitovke resmı túrde Alǵys jarııalanǵan. Bul marapat – aýyl qaýymdastyǵynyń úlken qurmetiniń jáne azamattyq belsendiliktiń dáleli.
О́mir boıy aýylda eńbek etken Erkebaı Baıjigitov avtomehanık, júrgizýshi, brıgadır, keıinnen «Shýıskoe HHI» JShS-niń mal sharýashylyǵy bóliminde uzaq jyldar eńbek etken. Búginde ol aýyl aqsaqaldar keńesiniń tóraǵasy retinde el ishindegi tártip pen birliktiń saqtalýyna ózindik úlesin qosyp keledi.
«Men bul aýylda týyp-óstim, ómirim osy jermen tyǵyz baılanysty. Aýyldyń tynyshtyǵy – árbir turǵynnyń jaýapkershiligine baılanysty. Ár úıde syılastyq bolsa, qoǵamda da tártip bolady. Zańdy qurmettep, elge adal eńbek etý – ár azamattyń boryshy», deıdi Erkebaı aqsaqal.
Shýıskoe aýyly búginde óńirdegi qarqyndy damyp kele jatqan eldi mekenderdiń biri. Aýyl sharýashylyǵy men mal sharýashylyǵy qatar damyp, turǵyndar óz eńbegimen kún kórip otyr. Biraq bul jetistik tek ekonomıkalyq damý arqyly emes, turǵyndardyń quqyqtyq sanasynyń joǵary bolýymen de baılanysty. Sebebi bul baǵytta aýyl turǵyndary men ýchaskelik polısııa ınspektory Bagdat Ýteýov arasynda tyǵyz áriptestik ornaǵan.
Munda quqyq buzýshylyqtyń aldyn alý tek polısııanyń mindeti emes. Árbir azamat bul iske óz úlesin qosyp, beıbit ómirdiń saqtalýyna jaýapty ekenin jaqsy túsinedi. Shýıskoe aýyly qoǵamdyq tártipti saqtaý ortaq jaýapkershilik ekenin ispen dáleldegen aımaqtardyń biri.