«Alibaba Group» asqazan qaterli isigin qarapaıym kompıýterlik tomografııa arqyly anyqtaı alatyn jańa jasandy ıntellekt júıesin jasap shyǵardy, dep jazady Egemen.kz.
«Grape» dep atalatyn bul model KT-sýretterdi úsh ólshemde taldaı otyryp, tájirıbeli dárigerlerdiń ózderi baıqamaı qalýy múmkin óte usaq ózgeristerdi anyqtaı alady. Klınıkalyq synaqtarda «Grape» 100 myń adamdy zerttep, 96,8% naqty nátıje kórsetken. Bul – model aýrýdy erte kezeńde joǵary dáldikpen anyqtaı alatynyn bildiredi. Tipti keıbir jaǵdaılarda «Grape» rentgenologtardan alty aı buryn qaterli isik belgilerin tapqan. Búginge deıin asqazan sııaqty qýysty múshelerdi KT arqyly zertteý qıyn dep eseptelip kelgen. Sebebi asqazan únemi qozǵalysta bolady ári alǵashqy zaqymdanýlar kózge birden túse bermeıdi. Osyǵan baılanysty dárigerler endoskopııa ádisine júginýge májbúr bolǵan. Al «Grape» modeli bul máseleni sheship otyr.
Zertteýshiler álemdegi eń úlken asqazan obyryna qatysty KT-sýretter bazasyn jasap, jasandy ıntellektini sol derektermen oqytqan. Nátıjesinde «Grape» tájirıbeli mamandardyń kózine túspeıtin zańdylyqtardy ajyratyp úırengen. Model jalǵan oń nátıjelerdi de barynsha azaıta otyryp, obyr jaǵdaılaryn erte kezeńde senimdi anyqtaı alady. Qazir «Grape» modelin Qytaıdyń Chjeszıan jáne Anhoı provınsııalarynda qoldaný josparlanyp otyr.
«Grape modeli – obyrdy ınvazıvti emes jolmen, erte anyqtaı alatyn zamanaýı sheshim. Bul – dıagnostıka salasyndaǵy úlken serpilis, ári adamdarǵa qoljetimdi ári qaýipsiz medısınalyq tekserýden ótýge jańa múmkindik beredi.