2025 jylǵy maýsymda eldegi ınflıasııa deńgeıi birshama baıaýlap, tutyný baǵalarynyń aılyq ındeksi 0,8%-dy qurady. Bul mamyr aıyndaǵy kórsetkishten (0,9%) tómen. Azyq-túlik pen keıbir qyzmet túrlerine baǵa arzandaǵanymen, basqa birqatar taýarlar men qyzmet kórsetý salasynda baǵanyń ósýi baıqaldy. Jyldyq ınflıasııa deńgeıi 11,8%-ǵa jetti, dep habarlaıdy Egemen.kz.
Ulttyq statıstıka bıýrosynyń málimetinshe, 2025 jylǵy maýsymda tutyný baǵalarynyń aılyq ındeksi baıaýlaı túsip, 0,8% qurady, al 2025 jylǵy mamyrda 0,9% paıyzdy quraǵan.
Azyq-túlik taýarlarynyń ishinde baǵa qııarǵa – 19,5%, qyryqqabatqa – 18,1%, qyzanaqqa – 15%, sarymsaqqa – 8,4%, bananǵa - 3,4%, jumyrtqaǵa 3% tómendegen. Osy oraıda balmuzdaq baǵasy 1,9% ósken, ıogýrt – 1,6%, jańǵaq – 1,5%, rýlet pen keksterge – 1,3%, kondıterlik ónimder men salqyndatylǵan sýsyndar – 1%-dan, sardelka baǵasy 0,9% qymbattaǵan.
Azyq-túlikke jatpaıtyn taýarlardyń ishinde maýsym aıynda turmystyq zattardan elektrli et tartqysh baǵasy 2,5%, útiktiki 1% ósken.
Tarıfter arasynan ystyq sý 6,2% tómendedi. Qyzmet kórsetý sektorynda baǵa fotograf qyzmetine 3,3% ósken, saltanatty sharalar ótkizetin uıymdastyrýshylarda – 2,8%, teledıdar jóndeý – 2,4%, turǵyn-úı, jaılardy jóndeý jáne qyzmet kórsetý – 1,4%, shashtarazdar men sulýlyq salondary qyzmetteri 1,3% joǵarylaǵan.
2025 jylǵy maýsymda jyldyq mánde ınflıasııa deńgeıi 11,8% qurady.
Jyldyq mánde qaraqumyq jarmasy – 9%, kúrish – 8,3%, qııar – 3,5%, suly jarmasy – 2,5%, keptirilgen órik 2,3% arzandady. Kerisinshe almurt – 11,3%, konservilengen júgeri – 10,8%, jemis jáne kókónis shyryndary 10,4% qymbattaǵan.
Azyq-túlik emes taýarlarynyń ishinde blender baǵasy 7,8% ósti.
2024 jylǵy maýsymmen salystyrǵanda ótken maýsym aıynda kabeldik televızııa qyzmetteri 2,2% joǵarylaǵan.
Inflıasııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Baqylaýlar qyzmetter men taýarlardyń tarıfteri men baǵalary – barlyǵy 508 pozısııa boıynsha júrgiziledi. Inflıasııa boıynsha dınamıkalyq ózgeristerdi 2018 jyldan bastap kórsetkishter qamtylǵan arnaıy ázirlengen ınteraktıvti dashbordta kórýge bolady.
Aıta keteıik, 2025 jylǵy qańtardan bastap tutyný baǵalarynyń ındeksin eseptegende azyq–túlik taýarlarynyń úlesi – 40,0%, azyq-túlik emes taýarlar – 30,3%, aqyly qyzmetter 29,7% qurady.