Qytaı sheteldik týrısterdi tartý jáne eldiń halyqaralyq bedelin arttyrý maqsatynda 74 memlekettiń azamattaryna 30 kúnge deıin vızasyz kirýge ruqsat berdi. Bul týraly QHR Ulttyq kóshi-qon qyzmeti málimdedi, dep jazady Egemen.kz Anadolý agenttigine silteme jasap.
Esterińizge sala keteıik, alǵash ret vızasyz rejım 2023 jylǵy jeltoqsanda Fransııa, Germanııa, Italııa, Nıderlandy, Ispanııa jáne Malaızııa azamattary úshin engizilgen bolatyn. Keıin bul tizim keńeıtilip, oǵan Eýropanyń kóptegen elderi, sondaı-aq Azııa, Taıaý Shyǵys jáne Latyn Amerıkasyndaǵy keıbir memleketter kirdi.
Sonymen qatar 16 shildeden bastap bul tizimge Ázerbaıjan da qosylady.
Qytaı bıliginiń málimetinshe, 2024 jyly elge vızasyz kelgen sheteldikter sany 20 mıllıonnan asady. Bul kórsetkish 2023 jylmen salystyrǵanda eki ese kóp.
Al AQSh, Kanada, Ulybrıtanııa, Shvesııa, Reseı jáne keıbir ózge memleketterdiń azamattary úshin ázirge tek Qytaı arqyly úshinshi elge ótetin tranzıttik sapar kezinde 10 kúnge deıin vızasyz kirýge ruqsat berilgen.
Qytaı týrızm akademııasynyń sarapshysy Lıý Sıanıannyń aıtýynsha, vızasyz rejım tek ekonomıkalyq ósimge emes, eldiń halyqaralyq ımıdjine de oń áser etedi.