Atyraý oblysynyń Qulsary qalasynda qoǵamdyq kólik pen moped soqtyǵysty. Jol apatynyń saldarynan mopedti aıdaǵan jasóspirim mert boldy, dep habarlaıdy Egemen.kz.
Atyraý oblystyq polısııa departamentiniń baspasóz qyzmetinen málim etkendeı, oqıǵa 7 shildede saǵat 19:00 shamasynda bolǵan.
«Qulsary qalasynda qoǵamdyq avtokólik pen moped soqtyǵysty. Jol apatynyń saldarynan mopedtiń rýlinde otyrǵan 2012 jylǵy jasóspirim aýrýhanaǵa jetkizildi. Jasóspirim alǵan dene jaraqattarynyń saldarynan qaıtys boldy. Qazir atalǵan jol-kólik oqıǵasyna qatysty qylmystyq is tirkeldi», dep habarlady departamenttiń baspasóz qyzmeti.
Jylyoı aýdandyq polısııa bóliminiń qyzmetkerleri keshendi tergeý amaldary júrgizilip jatyr. О́zge aqparat tergeý múddesine sáıkes jarııalaýǵa jatpaıdy.
«Ata-analar men kólik júrgizýshilerine jol qozǵalysy erejelerin saqtaýǵa, ásirese, jasóspirimderdiń qaýipsizdigine basa nazar aýdarýdy eskertemiz. Ásirese, moped, skýter jáne ózge kólik quraldaryn júrgizý kezinde qaýipsizdik talaptaryn qatań saqtaý – adam ómiriniń basty kepili. Kámeletke tolmaǵan balalarǵa arnaıy qorǵanysh quraldarynsyz jáne tıisti júrgizýshi qujatynsyz jolǵa shyǵýǵa qatań tyıym salynady», dep málim etti departamenttiń baspasóz qyzmeti.