Halyq ıgiligine baǵyttalǵan jobalar

100 myń turǵyndy tirshilik nári­men qamtamasyz etýdi kózdeıtin nysan qurylysy partııanyń 2023–2027 jyldarǵa arnalǵan Saılaýaldy baǵdar­lamasy aıasynda júzege asyrylyp jatyr. Joba Naýryzbaı aýdany men Almaty oblysyna qarasty Qarasaı aýdanynyń birqatar eldi mekenin sapaly aýyzsýmen qamtamasyz etýge baǵyt­talǵan. Jaýaptylar qurylys jumys­tary bıyl qarasha aıynda aıaqtalady dep otyr.

– Naýryzbaı aýdany – Almatyǵa jańadan qosylǵan, qazir belsendi damyp jatqan óńir. Sonymen qatar oǵan irgeles jatqan Qarasaı aýdanynyń turǵyndary da osy aýmaqqa qaraı bet buryp jatyr. Injenerlerdiń aıtýynsha, qurylys jumystarynyń 85%-y aıaqtalǵan. Negizgi ǵımarattar turǵyzyldy. Eger jospar­lanǵan merzimde aıaqtalsa, jeltoqsan aıynda turǵyndar taza sý tutynýǵa múm­kindik alady, – dedi depýtat A.Sarym.

Sý stansasy iske qosylǵannan keıin 70-80 turaqty jumys orny ashylady. Onyń ishinde sýdyń sapasyn baqylaıtyn zerthana da bolady. О́z kezeginde Sergeı Ponomarev jobanyń sapasyna, bıýdjet qarjysynyń tıimdi ıgerilýine jáne merdiger jumysyna jeke baqylaý júr­gizip otyrǵanyn jetkizdi.

– Sý tartý stansasy tabıǵaty kórkem Aqsaı shatqalynda ornalasqan. Aqsaı ózeni – Almatynyń eń taza sý kózderiniń biri. Biz tabıǵı resýrstardy saqtaý men tıimdi paıdalanýǵa úlken mán berýimiz kerek. Qazir ózen laılanyp tur. Kóp turǵyndar tómengi aımaqtarda sýmen qamtylmaı otyr. Sebebi qoldanystaǵy júıeler júktemege tótep bere almaı tur. Biraq jańa sý tartý stansasy iske qosylǵan soń, bul túıtkil túbegeıli sheshiledi, – dedi ol.

Al Májilis depýtaty, «Amanat» partııasy fraksııasynyń múshesi Baq­tyqoja Izmuhambetov Batys Qazaqstan oblysyndaǵy jańadan boı kóterip jatqan «Aqjaıyq» shaǵyn aýdanyna baryp qaıtty. 50 myń adamǵa arnalǵan strategııalyq aımaqtyń qurylysy – qarqyndy. Búginde 8 kópqabatty úı qoldanysqa berilip, baspana kezegindegi azamattar qonystanǵan. Jalpy aýmaqta 76 kóppáterli turǵyn úı qurylysy josparlanǵan. Qazir munda 150 oryndyq ońaltý medısınalyq ortalyǵy, sý aıdaý stansalary salynyp, magıstraldi ınjenerlik jeliler, jylý trassalary men ishki joldar tartylǵan.

– Aqjaıyq – halyq sanynyń artýy, qalalyq ınfraqurylymdy damytý jáne ómir sapasyn jaqsartý maqsatynda boı kóterip jatqan aýmaq. Munda tek úıler salyp qoımaı, jas otbasylar, mamandar, kezekte tur­ǵan azamattar úshin tolyqqandy ómir súrý ortasyn qalyptastyrýymyz qajet. Ol úshin qurylys jumystary jos­parlanǵan qaǵıdatqa saı – saıabaqtar, mektepter, emhanalar jáne qoljetimdi kólikpen qamtamasyz etilýge tıis, – dedi B.Izmuhambetov.

Kezdesý barysynda ol qazirgi ýaqytta Májiliste jańa Sáýlet-qurylys kodeksi qaralyp jatqanyn atap ótti. Jańa qujat qurylys sapasyn baqylaýdy kúsheıtýdi, anyqtalǵan kemshilikterge jedel áreket etýdi jáne qurylys materıaldaryna qoıylatyn talaptardy arttyrýdy kózdeıdi.

Qyzylorda qalasynyń sol jaǵa­laýynda aımaq tarıhyndaǵy eń aýqymdy sporttyq nysandardyń biri salynyp jatyr. Jalpy quny 20,9 mlrd teńgeni quraıtyn nysannyń qurylys jumystarymen Májilis depýtattary, «Amanat» partııasy fraksııasynyń músheleri Murat Ábenov, Marhabat Jaıymbetov pen Murat Ergeshbaev tanysty. Halyq qalaýlylary jergilikti fýtbolshylarmen kezdesip, usynys-pikirlerine qulaq túrdi.

«UEFA» talaptaryna saı salynyp jatqan jańa stadıon jergilikti bıýdjet esebinen qarjylandyrylyp jatyr. Qazirgi tańda fýtbol alańyn jabdyqtaý, ishki árleý jáne aýmaqty abattandyrý jumystary júrip jatyr. Jalpy syıymdylyǵy 11 myń orynǵa shaqtalǵan.

– Prezıdent Býrabaıda ótken «Ulttyq quryltaıda» fýtbolǵa qatysty birqatar tapsyrma berdi. Qyzylorda oblysy sol tapsyrmalardyń negizinde alǵash bolyp «UEFA» klassıfıkasııa­sy boıynsha III sanatty, sondaı-aq ha­lyqaralyq standarttarǵa tolyq sáıkes keletin jańa stadıon qury­lysyn bastap, qyrkúıek aıynda ótetin úlken oıynǵa daıyndyq ústinde. Oblys­tyq ákimshiliktiń ustanymymen «Qaısar» fýtbol komandasy alǵash ret legıonerlersiz oınap, ózimizdiń sportshylarǵa qoldaý kórsetip otyr. Kópshilik oıyn bolǵandyqtan fýtboldy nasıhattaýymyz qajet. Sonda jastardyń oıynǵa degen qyzyǵýshylyǵy artady, – dedi depýtat M.Ábenov.