Qazaqstanda medısınalyq-sanıtarııalyq alǵashqy kómek (MSAK) uıymdary deńgeıinde týberkýlezdi dıagnostıkalaýdyń zamanaýı jyldam molekýlalyq-genetıkalyq ádisteri engizildi, dep jazady Egemen.kz.
Bul tásil týberkýlez mıkobakterııalarynyń týberkýlezge qarsy preparattarǵa dárilik sezimtaldyǵyn 2 saǵattyń ishinde anyqtaýǵa múmkindik beredi. Emdeýdi bastamas buryn ýaqytty edáýir qysqartady jáne aýrýdyń taralý qaýpin azaıtady. Budan basqa, halyqaralyq standarttarǵa sáıkes keletin ftızıopýlmonologııanyń barlyq óńirlik ortalyqtarynda týberkýlezdi dıagnostıkalaýdyń zerthanalyq ádisteri qoljetimdi bolady. Sondaı-aq, ulttyq referens-zerthanada genomdyq sekvenırleý engizildi. Densaýlyq saqtaý mınıstrligi Ulttyq ftızıopýlmonologııa ǵylymı ortalyǵynyń málimetteri boıynsha, 2025 jyldyń 6 aıynda medısınalyq-sanıtarııalyq alǵashqy kómek (MSAK) uıymdarynda týberkýlezge kúdikti 44 941 adam XpertMTB/Rif ádisimen zertteýden ótken. Onyń ishinde 4 230 oń jaǵdaı anyqtalǵan (9,4%). Anyqtalǵan týberkýlez ınfeksııasy bar 8633 adamǵa profılaktıkalyq em júrgizilgen.