Astanada Perızat Qaırat pen onyń anasy Ǵaını Alashbaevaǵa qatysty qylmystyq istiń sot prosesi jalǵasyp jatyr, dep habarlaıdy Egemen.kz.
Búgingi otyrysta memlekettik aıyptaýshy Arman Kezeken sotqa qatysa almaǵan 11 kýágerden alynǵan jaýaptardy jarııa etti. Aıtýynsha, kúdikti Perızat Qaırat belgili ánshi Dımash Qudaıbergenniń qatysýymen ótetin festıvalge 10 mıllıon teńge kóleminde demeýshilik qoldaý tartýǵa tyrysqan.
«Skıf Treıd» JShS-niń ókili Maksım Abdýrazakovtyń kýá bolý jaıtyna súıensek, aıyptalýshy ony erekshe qajettiligi bar balalardy qoldaýǵa arnalǵan festıvalge shaqyryp, qarjylaı kómek kórsetýdi usynǵan. Áńgime 10 mıllıon teńge jaıynda bolǵan jáne is-sharanyń hedlaıneri retinde Dımash Qudaıbergen bolatyny habarlanǵan», – dedi prokýror Arman Kezeken.
Prokýror kýágerlerdiń jaýabyn oqyǵan soń, sotta taǵy birneshe adamnan jaýap alyndy. Perızat Qaırat isi boıynsha kýáger retinde jaýap bergen Ádilhan Mýsın qaıyrymdylyqqa jınalǵan qarajattyń qalaı qolma-qol aqshaǵa aınalǵanyn aıtyp berdi. Sózinshe, byltyr kóktemde Perızat Qaırat sý tasqynynan zardap shekkenderge kómektesý úshin Qytaı shekarasynan kıiz úı men basqa da taýarlar alýǵa qolma-qol aqsha kerek ekenin aıtqan. Mýsın oǵan birneshe jeke kásipkermen baılanys ornatýǵa kómektesken. Qordan sol kásipkerlerdiń esepshottaryna aqsha aýdarylyp, keıin olar qarajatty bankten sheship, qolma-qol kúıde Perızat Qaıratqa berip otyrǵan.
«Ol shuǵyl túrde kıiz úıler, bıodárethanalar jáne basqa da taýarlardy aımaqtarǵa jóneltý qajet ekenin aıtty. «Bir bóligi satyp alynǵan, biraq Qytaıdaǵy jetkizýshiler aqsha aýdarymyn qabyldamaı qoıǵan». Bul – Perızattyń sózi. Jaǵdaıdy tezirek sheship, kómekti jetkizý kerek boldy. Men kelistim. Sodan keıin óz tanystaryma, týystaryma júgindim. Sol kezde bári zań aıasynda júredi dep oıladyq, óıtkeni qor kelisimshart jasalady dep sendirdi», – dedi kýáger Ádilhan Mýsın.