Qasym-Jomart Toqaev Qazaqstannyń ınvestısııalyq tartymdylyǵyn arttyrý úshin qolǵa alynǵan reformalar sheteldik kásipkerlerge mol múmkindik beretinin aıtty.
Elimiz ashyq ári senimdi seriktes retinde túrik ınvestorlaryn qoldaýǵa árqashan daıyn.
Budan bólek Keńes otyrysynda eki el delegasııalary energetıka salasyndaǵy yqpaldastyq máselesine toqtaldy. Baký – Tbılısı – Jeıhan munaı qubyry arqyly eksport kólemin arttyrý máselesin talqylady.
Memleket basshysy túrik kompanııalaryn energııa tapshylyǵyn joıýǵa baǵyttalǵan jobalarǵa qatysýǵa shaqyrdy. Ásirese «QazMunaıGaz» ben Turkiye Petroleum arasyndaǵy yntymaqtastyqtyń nátıjeli bolatynyna senim bildirdi.
Qasym-Jomart Toqaev jańa Salyq kodeksinde shıkizatty tereń óńdeýge yntalandyratyn roıaltı tártibi, ıaǵnı aıryqsha múmkindikter qarastyrylǵanyn jetkizdi. Túrik ınvestorlaryna birlesken qor qurý arqyly taý-ken salasy men tabıǵı resýrstardy ıgerýge qatysty tyń jobalardy júzege asyrý usynylady. Eki eldiń aýyl sharýashylyǵy salasyndaǵy yntymaqtastyǵynyń bolashaǵy zor. Qazaqstanda óndiriletin dándi-daqyldyń tórtten biri, maqtanyń úshten bir bóligi, dán jelimshesiniń (kleıkovına) 26 paıyzy Túrkııaǵa eksporttalady. Jalpy, elimizde túrik kásipkerleriniń qatysýymen aýyl sharýashylyǵynda quny 1,3 mıllıard dollar bolatyn 23 ınvestısııalyq joba qolǵa alynǵan. Olardyń 18-i iske qosylyp, ónimderi halyqaralyq naryqqa shyǵarylýda.