Buqar jyraý aýdany Botaqara kentindegi Abaı kóshesinde aqynnyń eskertkish taqtasy ashyldy. Taqta avtory – belgili músinshi, aýdandyq máslıhattyń depýtaty Amantaı Aqyshev. Abaı taǵylymyna osylaısha taǵzym jasaǵan Amantaı Nurtaıulynyń bul izgilikti isi el aýzynda júr.
Ulttyq óner men tarıhty temirqazyǵyna aınaldyrǵan músinshi Qordaıdyń sur granıtine Abaıdyń portretin qashap salyp, onyń syrtyna kemeńger tulǵanyń «aqyn, qaırat, júrekti birdeı usta» degen ulaǵatty sózin jazyp qoıǵan. Munymen qosa, tómengi tusyna arnaıy QR kod qoıylǵan. Onda hakimniń ǵumyrbaıany men shyǵarmashylyǵy jónindegi málimetter toptastyrylǵan.
Aqyn kóshesindegi aǵaıyn sharapatty is-sharaǵa qýanyp, shashýyn shashyp, kıiz úıin tigip, meımandarǵa as berdi. Abaı kóshesiniń turǵyndary bul úlken syı boldy dep, sýretshi, rýhanııat janashyry Amantaı myrzaǵa alǵysyn jaýdyrdy.
Kósheniń basynda ornatylǵan eskertkish taqtanyń saltanatty ashylý rásiminde Buqar jyraý aýdandyq máslıhatynyń tóraǵasy Ashat Álı men aýdandyq ardagerler keńesiniń tóraǵasy Tóken Arbabaev quttyqtaý sóz sóıledi. Aýyl moldasy Sultanǵalı Bektasuly Abaı rýhyna Quran baǵyshtap, duǵa oqydy.
Aýdandyq ortalyq kitaphana qyzmetkerleri kóshe qýanyshyna ortaqtasyp, ashyq kórme ótkizdi. Qonaqtar Abaı shyǵarmashylyǵymen tanysyp, olarǵa jadynamalar taratyldy.
Odan soń halyq teatry uly Abaıdyń ómirinen shaǵyn qoıylym usynyp, aqynnyń óleńderi men qara sózderi oqyldy, ánderi shyrqaldy. Osylaısha, kósheniń kósheli toıy sán-saltanatymen ótti.
Amantaı Nurtaıuly – Buqar jyraý Qalqamanulynyń 350 jyldyq mereıtoı emblemasynyń avtory. Sol kezde avtor Bıken esimdi anasynyń aqylymen jeńimpazǵa taǵaıyndalǵan syıaqyny baba toıynyń kádesine beripti. Byltyr sheshen jáne ıngýsh ultynyń saıası qýǵyn-súrgin qurbandaryna 80 jyl tolýyna oraı, óz áýleti atynan úlken qorymǵa eki metrlik granıt tastan belgi ornatyp, yntymaqtastyq týyn kóterdi.
Atymtaı azamat qazir «Rýhanııat» qosymsha bilim berý ortalyǵynda beıneleý óneri bóliminiń ustazy. Shákirtteri halyqaralyq, respýblıkalyq saıystardyń jeńimpazy retinde tanylyp júr. Osyndaı eńbekteri eskerilip, memleket jáne qoǵam qaıratkeri Jumabek Táshenov atyndaǵy «Jyldyń úzdik qaıratkeri» syılyǵy tabystalǵan. Muraty bıik erdiń mereıi assyn deımiz.
Qaraǵandy oblysy,
Buqar jyraý aýdany,
Botaqara kenti