Shahrııar esimdi patsha áıeliniń opasyzdyǵynan keıin qatal zań ornatady. Kúnde basqa áıelge úılenip, tań ata ony óltirýge buıyrady. Súıgeni sezimin taptaǵannan keıin júregin solaı qorǵaǵysy keledi. Alaıda taǵdyr ony erekshe janmen jolyqtyrady. Ol – Shahrızada edi. Aqyldy áıel patshaǵa ár tún saıyn áserli áńgime, taýsylmas hıkaıa aıtyp bastaıdy. Kúnde eń qyzyq jerine kelgende toqtap, patshany yntyqtyryp qoıady. Áńgimeniń jalǵasyn bilý úshin patsha ony tiri qaldyrady. Osylaısha myń bir tún boıy toqtaýsyz aıtylǵan hıkaıalar Shahrızadanyń ǵana emes, patshanyń da taǵdyryn ózgertedi. Onyń tas júregin jibitip, sezimin oıatady. Qatygezdiginen arylyp, meıirimge bólenedi.
Mine, áńgime aıta bilý óneri ómirdi de saqtap qala alady. Al endi ańyzdan aqıqatqa oralsaq, – ǵylym da osyny rastap otyr. Izraıldegi Reıhman ýnıversıtetiniń professory Ron Shahar bastaǵan ǵalymdar júrgizgen zertteýler áńgimeleýdiń adam ómirine áserin anyqtaǵan. Olar 800 adam arasynda tájirıbe júrgizip, áńgime aıta biletin adamdar ómirdiń mánin tereńirek túsinedi degen qorytyndyǵa kelgen. Mundaı adamdar kez kelgen isti «qalaı jasaýǵa bolady?» dep emes, «nege jasaý kerek?» dep oılanady. Bul qasıet olarǵa ár nárseniń artyndaǵysyn kórýge kómektesedi.
Zertteý barysynda anyqtalǵan taǵy bir jaıt – áńgimeni áserli aıtýǵa beıim adamdardyń eki erekshe qabileti bar. Birinshisi – oqıǵalardy bir-birimen baılanystyryp, tolyqqandy, maǵynaly hıkaıa qura bilý. Ekinshisi – keıipkerdiń kózimen qarap, onyń jan dúnıesin túsiný. Professordyń pikirinshe, osy eki qabiletti óz ómirinde qoldana bilgen adam shynaıy maqsatyn anyqtap, «menin» tanıdy. «Jaqsy áńgime aıtý – jaı qarym-qatynas qana emes, adamnyń ishki álemin baıytatyn rýhanı azyq, ómirge mán darytatyn qural», deıdi Ron Shahar.