Áleýmettik jelide Shymkent qalalyq sotynyń sýdıasy Ábinur Qarabaevtyń sot barysynda BAQ ókiline aýzyn qısaıtqan óreskel áreketi túsirilgen vıdeo tarady. Qalalyq sot sýdıanyń qylyǵy ar-namysqa daq túsiretini rastalsa, Joǵary sot keńesi janyndaǵy sot alqasyna joldanatynyn habarlady, dep jazady Egemen.kz.
Á.Qarabaev Shymkent qalasy ákiminiń orynbasary R.Berdenovke jasalǵan qastandyq isi boıynsha sýdıa qyzmetin atqaryp júr. Endi onyń sot barysyndaǵy áreketi zańnama talaptaryna sáıkes tekseriledi.
«Shymkent qalasy ákiminiń orynbasaryna qastandyq jasaýǵa qatysty qylmystyq isti qaraý barysynda tóraǵalyq etýshi sýdıa Ábinur Qarabaevtyń áreketteri Sýdıalyq ádep kodeksin buzý-buzbaý turǵysynan tekseriledi. Onyń qorytyndysy boıynsha materıaldar sýdıa ádebi jónindegi komıssııanyń qaraýyna shyǵarylady. Eger sýdıanyń ar-namysyna daq túsiretin teris qylyq jasaǵany rastalsa, materıaldar Joǵary sot keńesi janyndaǵy sot alqasyna joldanady», delingen aqparatta.
Sondaı-aq, Shymkent qalalyq sotynyń baspasóz qyzmeti qandaı jaǵdaıda da sýdıalar ádep normasyn qatań saqtaýǵa mindetti ekenin atap ótken.