*Brent munaıynyń baǵasy barreline 62 dollarǵa jetti. Sarapshylardyń pikirinshe, buǵan iri munaı kompanııalarynyń ózderiniń qurylymdaryn ońtaılandyryp, personaldaryn qysqartýǵa degen nıeti sebep bolyp otyr. Búginge deıin álemdegi munaı kompanııalary 100 myń adamdy jumystan bosatyp úlgergen.
* Qytaıda kezekti joǵary laýazymdy sheneýnikke qatysty qylmystyq qýǵyndaý bastaldy. QHR parlamenti tóraǵasynyń burynǵy orynbasary Sý Jýnǵa óziniń qyzmet babyn iri kólemde para alýǵa paıdalandy degen aıyp taǵylyp otyr.
*Mysyr prezıdenti Ábdel Fattah as-Sısı BUU Qaýipsizdik Keńesin Lıvııaǵa halyqaralyq aralasý týraly qarar qabyldaýǵa shaqyrdy. Buǵan deıin Lıvııa sodyrlary 21 mysyrlyq balyqshyny ustap, óltirgen bolatyn. Osyǵan oraı, Kaır kek alý sharalaryna, ıaǵnı sodyrlar shepterin bombalaýǵa kirisip ketken edi.
*Japonııanyń soltústik-shyǵysynda magnıtýdasy 6,9 balldyq jer silkinisi tirkelgen edi. Osyǵan oraı, Ivate prefektýrasynda sýnamı qaýpi jarııalandy. Jaǵalaýdaǵy halyqqa qaýipsiz jerlerge jedel jetý usynyldy. Biraq keıin sýnamıden qaýip joq ekeni belgili boldy. Zilzala zardaby týraly aqparat joq.
* Iemende taǵynan taıdyrylǵan prezıdent Abd Rabbý Mansur Hadı jaǵyndaǵy qarýly jasaq el astanasy – Abden qalasynyń bir bóligin basyp alǵan. Bes saǵatqa sozylǵan urystan soń Hadıdi jaqtaýshy kóterilisshiler birqatar ákimshilik ǵımarattardy óz baqylaýyna kóshirgen. Teketires jalǵasyp jatyr.
* AQSh-tyń birqatar shtattarynda aýa raıy úlken qolaısyzdyq týǵyzyp tur. Vashıngtonda boran saldarynan memlekettik mekemeler men mektepter jabylyp qaldy. Avıakompanııalar 2,6 myń reısin keıinge shegerdi. Eldiń túrli bólikterinde qalyń jaýǵan qar saldarynan 1,2 mıllıon adam jaryqsyz otyr. 25 adam opat boldy degen derek bar.
*Danııanyń astanasy – Kopengagen qalasynda 30 myń adamdyq narazylyq sharasy bolyp ótti. Buǵan sebep – ótken senbi kúni Omar Ábdel Hamıd ál-Hýseın degen 22 jastaǵy lańkes terrorlyq qadamǵa baryp, eki evreı azamatyn óltirgen edi. О́zi de polısııa tarapynan jer jastandyrylǵan bolatyn.
* Eýroodaq sanksııa engiziletin (kirýge tyıym salý jáne esepshottardy jaýyp tastaý) adamdar tizimin keńeıtti. Bul joly qara tizimge 5 reseılik engizildi. Olar: qorǵanys mınıstriniń orynbasarlary Anatolıı Antonov pen Arkadıı Bahın, bas shtab bastyǵynyń orynbasary Andreı Kartopolov, ánshi Iosıf Kobzon jáne Memdýma depýtaty Valerıı Rashkın.
* AQSh-tyń Merılend shtatynda 16 jastaǵy bozbala ata-anasy men qaryndasyn atyp óltirgennen keıin ózi de polısııa qyzmetkerleriniń qolynan oqqa ushty. Aldyn ala boljam boıynsha, bozbala ata-anasynyń kompıýterdi paıdalanýǵa tyıym salýyna narazylyǵyn osylaı bildirgen syńaıly.
Aqparat agenttikteri materıaldarynyń negizinde ázirlendi.