«Biz sot tóreligin júzege asyrýdyń sapasyn jaqsartýmen ǵana shektelmeı, sot otyrystarynyń jarııalylyǵy men qoljetimdiligin qamtamasyz etýimiz qajet. Eń basty mindetimiz – óz aramyzda jemqorlyqqa qarsy batyl kúres júrgizip, aramyzdaǵy kásibı sheberligi tómen, adamgershilik-moraldyq beınesi kúmándi adamdardan aryltý» dep málim etti sot organdaryndaǵy jetistikter men kemshilikterdi saralaǵan keńeste Atyraý oblystyq sotynyń tóraǵasy Muhtar Smaǵulov.
Tóraǵanyń málim etýinshe, byltyr óńir sottarynda 27175 is qaralypty. Onyń ishinde 1995-ten astamy azamattyq, 1507 qylmystyq, 23673-ten astam ákimshilik quqyq buzýshylyq isteri bar eken. Sýdıa medıatorlardyń qaraýyna 706 is berilgen. Sot sheshimderin shyǵarǵan kezde bas bostandyǵynan aıyrmaı jaza taǵaıyndaýdyń úles salmaǵy kóbeıe túsýde. 9 adamǵa qatysty aqtaý úkimi shyǵarylǵan.
– Sonymen birge, byltyrǵy jyldyń shildesinen beri qoldarynda sıfrly elektrondy qoltańbalary bar azamattarǵa «Sot kabıneti» arqyly talap aryzdaryn, sot otyrystarynyń hattamalary men hattamalarǵa eskertýlerdi, usynystaryn jiberýge, elektrondy kóshirmelerdi alýǵa múmkindik týdy. Osy joba aıasynda, ıaǵnı «Sot kabıneti» arqyly 2442 elektrondy talap aryz, 9 hattamaǵa eskertý, 902 hattamanyń kóshirmesin alýǵa ótinish, 56 elektrondy shaǵym sekildi barlyǵy 30409 ótinish kelip tústi, – dedi oblystyq sottyń tóraǵasy.
Joldasbek ShО́PEǴUL,
«Egemen Qazaqstan».
Atyraý oblysy.