Ertis-Baıan óńirindegi jańa oqý ordasy

Pavlodardaǵy alǵashqy «Keleshek mektebi»

Oblys ortalyǵynda «Keleshek mek­tep­teri» ulttyq jobasy aıasynda alǵash­qy bilim uıasy esigin aıqara ashty. 1200 oqýshyǵa arnalǵan qazaq mektebi qajetti oqý quraldarymen, oqýshylardy kásiptik beıimdeýge arnalǵan arnaıy kabınettermen jabdyqtalǵan.

«Keleshek mektepteri» modeli – elimiz­degi orta bilim sapasyn arttyrýdyń stra­tegııalyq negizi retinde aýyl men qala mektepteri arasyndaǵy alshaqtyqty joıýǵa baǵyttalǵan, teńdesi joq bastama. Al Pavlodardaǵy «Dostyq» shaǵyn aýdanynda iske qosylyp otyrǵan jańa qazaq mektebin bul tóńirekti meken etken otbasylar uzaq kútken. Jańa ǵımarat aýmaqtaǵy oqýshy tapshylyǵy máselesin tolyqqandy sheship otyr. 1200 oqýshyǵa shaqtalǵan №48 mektepke qazirdiń ózinde 1050 bala qabyldanyp qoıypty. Oqýshylar áli de úzbeı kelip jatyr. Mekteptegi barlyq oqý kabınet­teri qajetti jıhazdarmen, oqýǵa qajetti qural­darmen jabdyqtalǵan, ásem bezen­dirilgen ǵımarat ishi balalardyń bilim alýǵa degen yntasyn arttyra túsetin­deı. Bıyl munda tek qana birinshi synypqa 164 bala kelgen.

Zamanaýı bilim ǵımaratynyń ashylý saltanatyna arnaıy qatysqan Oqý-aǵartý mınıstri Ǵanı Beısembaev atap ótkendeı, Memleket basshysynyń bas­tamasymen júzege asyrylyp jatqan «Keleshek mektepteri» ulttyq jobasy aıasynda elimiz boıynsha 460 myń orynǵa arnalǵan 217 jańa formattaǵy mektep salynyp jatyr. 1 qyrkúıekte 130 mektep oqýshylar ıgiligine tapsyryldy.

«Keleshek mektepteriniń» teń jartysy aýyldyq jerlerde boı kóterip jatyr. Ulttyq jobanyń kózdeıtin mejesi – zamanǵa saı jabdyqtalǵan mek­tep­ter arqyly álemdik básekege qabi­letti ult keleshekterin tárbıeleý. Buǵan qosa Memleket basshysynyń orta bilim salasynda teń múmkindikter qurý týraly tapsyrmasynyń oryndalyp jatqanynyń oń kórinisi deýge bolady. Sebebi barlyq mektep bir úlgide, tipti ishki árlenýi, bezendirilýi bir qalypta. Elimizde bilim sapasyn arttyrýǵa baǵyttalǵan keń aýqymdy jumys júrip jatyr. JI-di bilim salasyna engizýdi bastap kettik. Bul úshin alǵashqy bette 180 myń pedagog arnaıy daıyndyqtan ótti. Oqýshylar úshin arnaıy bilim platformasy ázirlendi. JI mekteptegi bilim sapasyn arttyrýǵa negiz bolýy kerek. Bul tarapta ata-analar úshin de arnaıy kýrstar uıymdastyrylady. Bir sózben aıtqanda, JI-di kúndelikti bilim salasynda paıdalanýdyń joǵary mádenıetin qalyptastyrýymyz kerek», dedi mınıstr.

Mamandar qabyrǵadaǵy jazý men sýret te bilim sapasyna áser etetinin anyq­taǵan. Sondyqtan aldaǵy úsh jyl ishinde elimizdegi barlyq mekteptiń ishki bezen­dirilýi teńestiriledi. Oqý-aǵartý mınıstrligi bul turǵyda barlyq mekteptiń jumysyna aralasyp, ádistemelik jáne mazmundyq jaǵynan jetildirýge tikeleı kómektesedi. Buǵan qosa, elimizde 1231 mektepti qamtıtyn renovasııalaý baǵdarlamasy iske asyrylyp jatyr. Onyń 820-sy aýyldyq jerlerde ornalasqan. Úsh jylǵa eseptelgen bul baǵdarlama aıasynda kúrdeli jóndeý, kitaphanalar men ashanalardy jańartý, sport zaldaryn qaıta qurý, zamanaýı ortaq keńistikter qurý jáne qaýipsizdik júıelerimen jabdyqtaý kózdelgen. Sondaı-aq ata-analardyń bilim-tárbıe berý baǵytyndaǵy túsinikterin transfor­masııalaýǵa mán beriledi. Iаǵnı ata-ana bastaýysh, orta jáne joǵary synyptarda oqıtyn balalaryna jas ereksheligine qaraı qandaı tárbıe berýi kerektigi týra­ly tujyrymdardy úırenedi.

«Pavlodar oblysy bıliginiń bilim salasyna degen aıryqsha qamqor­lyǵy baıqalyp otyr. Ásirese shaǵyn jınaq­ty mektepterge oń kózqaras bar. О́ńir­degi aýyldyq jerlerde 200-ge jýyq shaǵyn jınaqty mektep tirkelse, solar­dyń barlyǵyn jańartý kózdelip otyr. Bıyl aýyldyq mektepterdi zamanǵa saı jańar­týǵa 12 mlrd teńge bólinip, ár mektepte shamamen 300–500 mln teńgeden qarastyrylypty. Bul – aýyldarymyzdyń saqtalyp qalýyna, aýyl mektepterindegi bilim salasyn arttyrýǵa úlken kómek. Endigi jerde aýyl pedagogteriniń bilim deńgeıin kóterýge kóńil bólemiz. Bala qaı óńirde, qaı eldi mekende, qaı mektepte oqysa da, sapaly bilimge qol jetkizýi kerek. Memleket basshysynyń qoıyp otyrǵan tapsyrmasy da osy», dep qosty Ǵanı Beısembaev.

Oblys ákimi Asaıyn Baıhanov zamanaýı mektep jańadan salynyp jat­qan «Dostyq» shaǵyn aýdanynyń órken­deýine túrtki bolatyn áleýmettik basta­malardyń biri ekenin jetkizdi. Aıtýyn­sha, aýmaqtaǵy ınfraqurylym qar­qyn­dy damyp keledi. Buǵan deıin aýdanda kópqabatty 15 áleýmettik turǵyn úı tapsyrylyp, 5 myńnan astam otbasy bas­panaly bolǵan. Aldaǵy ýaqytta aýmaqta 240 sábıge arnalǵan balabaqsha, emhana, balalarǵa arnalǵan kóptegen oıyn jáne sport alańyn turǵyzý jos­par­lanǵan.

«Dostyqta» buǵan qosa jabyq muz aıdynyn, bir jarym myń kórermen syıatyn kongres-holl, bes myń adamǵa laıyqtalǵan, basseıni bar sport keshenin turǵyzý kózdelgen. Bul jobalardyń barlyǵy turǵyndardyń ómir sapasyn arttyrýǵa baǵyttalǵan ıgi bastamalardyń jalǵasy», dedi óńir basshysy.

№48 orta mektep úsh qabattan, 10 bloktan turady. Birinshi blokta oqýshylarǵa kásiptik baǵdar berýge arnalǵan kabınetter ornalasqan. Ǵımaratta eki sporttyq zal, 245 oryndyq ashana bar. Mektep dırektory Aınur Bekbaevanyń sózinshe, «Dostyq» shaǵyn aýdanyndaǵy balalardy eseptemegende, jaqyn jerdegi №21 mektepten 500 oqýshy aýysyp kelipti. Atalǵan mekteptegi qazaqtildi synyptarǵa sabaq beretin pedagogter quramy da jańa bilim uıasyna aýysyp jatyr. Mektep ákimshiligi tolassyz kelip jatqan oqýshylar sanyna qarap, bola­shaqta munda bilim alatyndar sany 1500-ge jetip qalýy yqtımal ekenin aıtady.

Ata-analar atalǵan qazaq mektebin birneshe jyldan beri kútkenderin jetkizdi. Tolǵanaı Nurdildábekova úl­ken balasy bıyl 3-synypqa barǵanyn, buǵan deıin №21 mektepte oqyǵanyn baıan etti.

«Ol mektep eski ári tar edi. Endi dál úıimizdiń janynda qazaq balalaryna arnalǵan mynadaı záýlim ári keń bilim uıasynyń boı kótergenine qýanyshtymyz. Mundaı jaǵdaı jasap jatqan memleket basshylyǵyna, óńirdiń bilim salasyna jaýapty azamattarǵa alǵysymyz sheksiz. Endi biz, ata-analar, bul mektepke tilekshi bolyp, úıde balalarymyzdyń tárbıesine burynǵydan da kóbirek mán beremiz dep oılaımyn», deıdi ol.

Qazirgi ýaqytta «Keleshek mektepteri» ulttyq jobasy boıynsha Pavlodar qalasynda 600 oqýshyǵa arnalǵan taǵy bir jańa mektep salynyp jatyr. Onyń qurylysy jyl sońyna deıin aıaqtalady dep kózdelgen.

Úsh aýyldaǵy qýanysh

Jańa oqý jyly qarsańynda Ertis-Baıan óńiriniń úsh birdeı aýylynda jańa mektepter boı kóterdi. Olar Aqqýly aýdanynyń Tilektes aýylynda, Ertis aýdanynyń Bulanbaı aýylynda, Pavlodar aýdanynyń Birlik aýylynda ashylyp otyr.

Tilektes aýylyndaǵy aıadaı ǵana eski mekteptiń ǵımaraty apattyq jaǵdaıda dep tanylyp, oblys ákimi Asaıyn Baıhanov jergilikti jurtpen kezdesýde jańa bilim oshaǵyn salyp beremiz dep ýáde etken. Aıtqandaı, jańa mektep nebári bes aı merzimde turǵyzyldy.

«Memleket basshysy Qasym-Jomart Toqaev: «Álemde balalardyń baqyty men kúlkisinen mańyzdy eshteńe joq. О́skeleń urpaqtyń jan-jaqty damýy úshin qolaıly jaǵdaı jasaý – árqashan bizdiń memleketimizdiń basty mindetteriniń biri», degen edi. Aýyl balalarynyń áleýetin ósirý, olardyń zamanǵa saı mektepterde bilim alýyna qol jetkizý biz úshin irgeli maqsattardyń biri bolyp qala beredi. Tilektes aýy­ly adamdarynyń ótinishi az ýaqyt ishinde oryndalǵanyna qýanyshtymyn. Keleshekte osy mektepten bilimimen álemdi moıyndatar azamattar túlep usha ber­sin», dedi óńir basshysy mekteptiń ashylý saltanatynda.

Mundaı záýlim ári zamanǵa saı bilim uıasy aýyl oqýshylary úshin kóp jyldan beri arman edi. Hımııa, fızıka, ınformatıka kabınetteri ozyq qural-jabdyqtarmen qamtylǵan. Mektep 90 oqýshyǵa laıyqtalyp salynǵanymen, jańa oqý jylynda ázirshe 52 bala bilim alatyn bolady.

«Mektep janynan 20 balaǵa arnalǵan shaǵyn ortalyq ta ashylyp jatyr, onda 10 bala tárbıelenedi. Bul jerde júz jyl buryn alǵashqy bastaýysh mektepter qurylǵan. Endi sol jańaryp, qýanyshymyzdy eselep otyr. Investor kompanııa barlyq oqýshymyzǵa mektepke arnalǵan jáne sporttyq kıimderin syıǵa tartty», dep atap ótti Tilektes orta mektebiniń dırektory Aınur Bekbaýova.

Aýdandyq bilim bóliminiń ádistemelik kabınet meńgerýshisi Gúlshat Battalova oqý orny óz tarıhynda alǵash ret jańa sporttyq zalǵa ıe bolyp otyrǵanyn jetkizdi. Buǵan deıin balalar jazda dalada, qysta tar kabınetterde dene­­shy­nyqtyrý sabaǵyn oqyp kelgen. «Memleket basshysy mektep baǵdar­lamasyna jasandy ıntellektini engizý týraly tapsyrma berdi. Endi Tilektes mektebi aýdanymyz boıynsha JI engizilgen alǵashqy qanatqaqty bilim uıasy bolady. Sebebi munda aqparattyq quraldar, sonyń ishinde ZD prınter qoıylǵan», dedi ol.

Aýyl turǵyny Rýslan Mýsın mundaı keń ári jaryq mektep aýyl balalarynyń bilimge degen qulshynysyn arttyratynyn, aldaǵy ýaqytta jas otbasylardyń turaqtap qalýyna múmkindik beretinin aıtty.

Bilim kúni qarsańynda Ertis aýda­nynyń Bulanbaı aýylynda da jańa mektep paıdalanýǵa berildi. Bıylǵy qańtar aıynda mundaǵy eski mektep ǵıma­ratynda órt shyǵyp, nysan toly­ǵymen janyp ketken edi. Jańadan salynǵan mekteptiń jalpy aýdany – 241,1 sharshy metr. Alty oqý kabıneti, mektep jasyna deıingi balalarǵa arnalǵan mektepaldy daıarlyq, kompıýterlik synyp, sport jáne májilis zaly, ashana ornalasqan. Bıyl munda 20 bala bilim alady. Bilim úderisin 11 pedagog qamtamasyz etedi. Ǵımarat eki aıdyń ishinde salynyp, jańa oqý jylynyń bastalýyna tolyqtaı da­ıyn boldy.

Aýyl turǵyndary jańa mektep úshin júrekjardy alǵystaryn bildirdi.

«Mektep órtenip ketkende, bárimiz aýyldyń bolashaǵyna alańdadyq. О́ıt­keni keleshegimiz tikeleı mekteppen baı­la­nysty. Biz úshin mektep – aýyldyń júregi. Balalarymyz kórshi aýyldarǵa ketýge májbúr bola ma dep qoryqtyq. Ákim jańa mektep salýǵa ýáde berip, sózinde turdy. Búgin balalar jańa synyptarǵa kirip, kóńilimiz jaılandy», deıdi kópbalaly ana Bekzat Qymbat.

Al Birlik aýylynda 40 jyldan astam ýaqyt mektep bolmaǵan. Eldi meken­niń júzge jýyq balasy kún sa­ıyn respý­b­lı­kalyq trassa arqyly Zarıa aýylyna qatynap, tórt aýysymmen oqýǵa májbúr bolyp kelgen. Ata-analar bala­larynyń qaýipsizdigine alańdady. Oqý­shy­lar úıirmeler men seksııalarǵa da bara almady. Aýyl turǵyndary mek­tep salý máselesin birneshe márte kóter­gen edi.

Jańadan ashylǵan bilim uıasy 120 oqýshyǵa arnalǵan, ǵımarattyń jalpy aýdany bir myń sharshy metrden asady. Munda 14 kabınet, onyń ishinde ınformatıka, hımııa jáne bıologııa pánderi boıynsha mamandandyrylǵan kabınetter jabdyqtalǵan, zamanaýı sport zaly, sheberhana, kitaphana, 48 oryndyq májilis zaly, ashana jáne medısınalyq kabınet bar. Mektep jasyna deıingi balalar úshin 40 oryndyq shaǵyn ortalyq ashyldy.

Oblys ákimi Birlik aýylyndaǵy joba ofteık-kelisimshart júıesi boıyn­sha iske asyrylǵanyn atap ótti. Iаǵnı kásip­kerdiń óz qarajaty esebinen salynyp, memleket daıyn ǵımaratty satyp aldy. Bul mehanızm apatty jaǵdaıdaǵy mektepterdiń máselesin sheshýde basqa aýdandarda da tıimdiligin kórsetken.

Pavlodar oblysy