Memleket basshysynyń tapsyrmasyna sáıkes, agroónerkásip keshenindegi qaıta óńdelgen ónimniń úlesi 70%-ǵa jetkizilýi tıis. Ony oryndaý maqsatynda memlekettik qoldaýdyń keshendi sharalary iske asyrylyp jatyr, dep habarlaıdy Egemen.kz.
Byltyrǵy jyly AО́K ónimderin eksporttaý kólemi $5,1 mlrd bolǵan. Onyń 52%-y qaıta óńdelgen ónimge tıesili, $2,6 mlrd quraıdy. 2024 jyly bul kórsetkish 43% bolǵan, bul otandyq qaıta óńdeý salasynyń turaqty damý qarqyny men básekege qabilettiliginiń artyp kele jatqanyn aıǵaqtaıdy.
Aıta keteıik, elimizde qaıta óńdeý salasynda shamamen eki myń kásiporyn jumys isteıdi. Onyń ishinde sút (18,8%), et (18,5%), astyq (17,4%) jáne maı-shıkizat (12,5%) salalary kósh bastap tur. 2024 jyly 41,5 mlrd teńge kóleminde 51 ınvestısııalyq joba júzege asyrylǵan.
Bıyl bızneske qoldaý kórsetý maqsatynda qaıta óńdeý kásiporyndaryn aınalym qarajatyn tolyqtyrý úshin jyldyq mólsherlemesi 5%-ben jeńildetilgen nesıe berý jalǵastyryldy. Osy maqsattarǵa 44 mlrd teńge bólinip, 60-tan astam ótinim maquldanyp, 26 mlrd teńgeden astam qarjy bólingen.
«Qaıta óńdeý kásiporyndaryn salý nemese jańǵyrtýǵa ınvestısııalyq sýbsıdııalaý jumys isteıdi. Bul maqsatta shyǵynnyń 15–50%-yn óteý qarastyrylǵan. Qant salasynda ótemaqynyń kólemi 40%-ǵa deıin artty, jumyrtqa óńdeýde sýbsıdııa 40%-ǵa deıin engizildi, al sút salasynda qurǵaq sút pen sarysý jabdyqtaryna shyǵynnyń 25%-yna deıin ótemaqy qarastyrylǵan. Kásiporyndardy shıkizatpen qamtamasyz etýge aıryqsha kóńil bólinýde. Osy maqsatta turaqty jetkizilimdi qamtamasyz etetin sút fermalary, qoı sharýashylyǵy kásiporyndary jáne qabyldaý pýnktteri jelisi qurylady. Fermerlerge qoldaý qaıta óńdeýge tapsyrylǵan juqa jáne jartylaı juqa jún kólemine sýbsıdııalaý arqyly da kórsetiledi, bul bir jaǵynan óndirýshilerdiń shyǵyndaryn azaıtyp, ekinshi jaǵynan qaıta óńdeý kásiporyndarynyń qýatyn tolyq paıdalanýyna múmkindik beredi», delingen habarlamada.
Sonymen qatar ishki naryqty qorǵaý maqsatynda shıkizatty eksportqa shyǵarýǵa shekteýler engizilgen. Atap aıtsaq, maıly daqyl tuqymdaryn shyǵarýǵa baj salyǵy qoldanylyp, tiri mal eksporty kvotalanǵan, sondaı-aq teri men jún shyǵarýǵa shekteýler qoıylǵan.