ATYRAÝ. 18 aqpan. Atyraý oblysynyń H.Erǵalıev aýylynda turatyn burynǵy tiginshi Almagúl Sakýpova kásibin qaıta jańǵyrtýǵa múmkindik aldy. Bul týraly egemen.kz habarlady.
Buryn ózi turatyn aýyldaǵy turmystyq qyzmet kórsetý kombınatynda jumys jasaǵan eken. Kombınat ǵımaraty jekeshelendirilgennen keıin jumyssyz qalýyna týra kelipti. Kásibin qaıta jańǵyrtýdy kózdegen tájirıbeli tiginshi Aýyl sharýashylyǵyn qarjylaı qoldaý qoryna júginip, 1,5 mıllıon teńge nesıe alýǵa ótinish beripti. Qor basshylyǵy aýyldaǵy tiginshiniń talpynysyna qoldaý kórsetti. Osylaısha, 6 paıyzdyq ósimmen qaıtarylatyn nesıege qol jetkizgen Almagúl Sakýpova baspanasynyń eki bólmesinen tigin sheberhanasy men shashtaraz salonyn ashty.
Qazir tiginshiniń «Úmit» dep atalatyn tigin sheberhanasyna Meńsulý Jarollına, Tilekshi Ábilova men Nurjamal Qadirova turaqty jumysqa alyndy. Olar tapsyryspen qyz jasaýyn, tósenish jáne jamylǵy kórpeler sekildi kúndelikti tutynatyn buıymdar tigýdi bastady.
«Aýyldastarymyzdyń suranysymen kıimderdi taryltý, qysqartý, áıelderge arnalǵan kóılekter tigýdi de bastadyq. Endi tekemet basýdy qolǵa alyp, ulttyq qolónerdi damytsaq deımiz. Mundaı isterge balallarym da beıim. Uldarym shash qııady, qyzdarym tigin tigedi», deıdi ómirlik serigi Esenǵalı Naýanovpen birge 8 balasyn tárbıelep, «Altyn alqaǵa» ıe bolǵan tiginshi Almagúl Sakýpova.
Joldasbek Shópeǵul.
Derek, sýret: «Atyraý» gazeti.