Prokýrorlar dabyl qaqty

Bas prokýratýra Quqyqtyq statıs­tıka jáne arnaıy esepke alý jónindegi komıtetiniń Pavlodar oblysy boıynsha departamenti Ertis-Baıan óńiri elimizdegi ınternet-alaıaqtyq deńgeıi joǵary bes aımaqtyń qataryna kiretinin málim etti.

«Almaty men Astana qalalary, sondaı-aq Qaraǵandy men Almaty oblystarynan keıingi orynda bizdiń óńir tur. Alǵashqy jeti aıda oblysta alaıaqtyqqa qatysty 1 208 derek tirkelgen. О́tken jyldyń sáıkes kezeńinde bul kórsetkish 842 bolǵan, ıaǵnı ósim 43 paıyzdan asady. Alaıaqtardyń áreketinen kelgen jalpy materıaldyq shyǵyn 164 mln teńgeni qurady, onyń tek 12 mln teńgesi ótelgen», dep habarlady departamentten.

Alaıaqtyq oqıǵalarynyń eń kóp ósýi Pavlodar qalasynda jáne Tereńkól, Ýspen aýdandarynda baıqalǵan. Al Aqqýly, Aqtoǵaı jáne Sharbaqty sııaqty aýdandarda kerisinshe tómendegen.

Quqyqtyq statıstıka departamentiniń málimetine sáıkes, tirkelgen alaıaqtyq­tardyń basym bóligi (86,3 paıyz) ınternet arqyly jasalǵan. Alaıaqtyq qylmystardyń ashylý kórsetkishi nebári – 28,1 paıyz, al ınternet-alaıaqtyqtar boıynsha – 17,5 pa­ıyz deńgeıinde. Alaıaqtardyń qurbandary kóbine 60 jastan asqan azamattardy quraıdy (jábirlenýshilerdiń 25,9 paıyzy).

Prokýratýra ókilderiniń aıtýynsha, alaıaqtyqtardyń ósýiniń birneshe negizgi sebebi bar. Bul – qyzmet kórsetý, saýda jáne qarjy salalaryndaǵy sıfrlandyrýdyń jappaı ósýi, egde jastaǵy azamattar arasyndaǵy sıfrlyq saýattylyqtyń jetkiliksizdigi, sondaı-aq bul saladaǵy qylmystardy tergeýdiń kúrdeliligi.

Atalǵan máselemen kúresý úshin prokýrorlar onlaın-platformalarda paıdalanýshylardy mindetti túrde ıdentıfıkasııalaýdy, kúmándi operasııalardy baqylaý tetikterin engizýdi, nesıeler berýge baqylaýdy kúsheıtýdi, sondaı-aq azamattardyń ózderiniń saq bolýyn usynady. Onlaın-platformalardyń óz klıentteriniń qaýipsizdigi úshin jaýap­kershiligin arttyrý jáne azamattardy kıberqaýipsizdik negizderine belsendi oqytý – alaıaqtyqpen kúresti aıtarlyqtaı jeńildete alady.

Pavlodar oblysy