О́tken aptanyń jumasynda elimizdiń Atom energııasy jónindegi agenttiginde Almaty oblysy Jambyl aýdanynda salynýy josparlanǵan atom elektr stansasyna ataý berý boıynsha jalpyhalyqtyq konkýrs ótkizý máselelerin qaraǵan jumys tobynyń ekinshi otyrysy ótti, dep habarlaıdy Egemen.kz.
Otyrysqa jumys tobynyń quramyna engen memlekettik organdar, ǵylymı uıymdar men salalyq kompanııalar ókilderi qatysty. Is-sharaǵa Atom energııasy jónindegi agenttik tóraǵasy Almasadam Sátqalıev tóraǵalyq etti. Ol otyrystyń mán-maǵynasy el tańdaýy mańyzdy ekenin aıtty.
Talqylaý barysynda konkýrstyq komıssııanyń erejesi men quramy bekitildi. Onyń quramyna túrli qoǵam ókilderi, kreatıvti ındýstrııa mamandary, sondaı-aq atom energetıkasy, fılologııa jáne tarıh salalarynyń sarapshylary kirdi. Budan bólek, ótinimderdi berý men qaraý tártibin, olardy baǵalaý ólshemsharttaryn jáne qorytyndy sheshim qabyldaý rásimderin aıqyndaıtyn konkýrsty ótkizý erejesiniń jobasy qaraldy.
Jumys tobynyń músheleri atom elektr stansasynyń ataýyn aıqyndaý sheshimi birqatar faktorlardy eskere otyryp qabyldanatynyn atap ótti. Konkýrstyq komıssııa usynystardy ataýdyń tanymaldylyǵy, tarıhı jáne mádenı mańyzdylyǵy, atom energetıkasynyń ımıdjine sáıkestigi, áýezdiligi, este saqtaýdyń jeńildigi, biregeıligi ári ózindik ereksheligi sekildi ólshemsharttar boıynsha baǵalaıdy.
Sonymen qatar, qorlaıtyn nemese kemsitýshilik sıpattaǵy sózderdi, beıádep leksıkany, kommersııalyq brendterdi qamtıtyn, sondaı-aq Qazaqstan Respýblıkasynyń zańnamasyn jáne úshinshi tulǵalardyń quqyqtaryn, onyń ishinde avtorlyq quqyqty buzatyn ataýlar qabyldanbaıdy.
Azamattardyń yqylasty qatysýyn qamtamasyz etý maqsatynda sıfrlyq sheshimderdi qoldaný josparlanýda. Osy oraıda Sıfrlyq damý, ınnovasııalar jáne aeroǵarysh ónerkásibi mınıstrligi «Ulttyq aqparattyq tehnologııalar» AQ-men birlesip, ótinimderdi eGov Mobile qosymshasy arqyly qabyldaý jóninde usynystar engizdi.
Otyrys qorytyndysy boıynsha konkýrstyń negizgi uıymdastyrýshylyq qujattary bekitilip, ony ótkizý boıynsha aldaǵy qadamdar aıqyndaldy. Bolashaq atom elektr stansasyna ataý berý jónindegi baıqaý azamattardy tartýdyń mańyzdy quralyna aınalyp, eldiń mádenı jáne tarıhı qundylyqtaryn aıqyndaýǵa múmkindik beredi.