Bas prokýratýranyń habarlaýynsha, RMQK «Baldáýren respýblıkalyq oqý-saýyqtyrý ortalyǵynda» sanıtarlyq-epıdemıologııalyq tártiptiń buzylǵany anyqtalǵan, dep jazady Egemen.kz.
Tekserý barysynda lager jobalyq qýatyn da asyra paıdalanylǵan. Tehnıkalyq pasportqa sáıkes, ortalyq 400 orynǵa laıyqtalǵanmen, is júzinde bir aýysymda 574 bala ornalastyrylǵan. Bul ruqsat etilgen normadan 43%-ǵa artyq ekeni belgili boldy.
Balalardy ornalastyrý úshin 12 oqý kabıneti paıdalanylǵan. Quzyrly organ bul bólmelerdiń sanıtarlyq toraptarmen jabdyqtalmaǵanyn, gıgıenalyq talaptarǵa saı kelmeıtinin jáne kámeletke tolmaǵandardyń densaýlyǵyna qaýip tóndiretinin atap ótken. Norma boıynsha bir bólmede 6 bala bolýy tıis bolsa, is júzinde 9 balaǵa deıin ornalastyrylǵan.
«Aıryqsha nazar aýdartatyny – memlekettik kvota esebinen tegin demalyp jatqan balalar tar jáne qolaısyz bólmelerde ornalassa, al aqyly negizde kelgen balalar bólek, barlyq jaǵdaıy jasalǵan bólmelerge jaıǵastyrylǵan. Anyqtalǵan zań buzýshylyqtardy joıý, kináli tulǵalardy jaýapkershilikke tartý jáne bolashaqta balalardyń ómiri men densaýlyǵyna qater tóndirmeý maqsatynda prokýrorlyq qadaǵalaý sharalary qabyldandy», delingen Bas prokýratýra habarlamasynda.