Áıelder kúresi elimizge kesheýildep jetti. Tipten onyń Olımpıada baǵdarlamasyna engenine de asa kóp ýaqyt óte qoıǵan joq. Soǵan qaramastan bul sport túrin bizdiń qyzdar jaqsy meńgerip, qysqa merzim aralyǵynda bıik belesterdi baǵyndyryp úlgerdi. Basqasyn aıtpaǵanda, álem chempıonatynyń ózinde birqatar balýanymyz júldeli oryndardy oljalady.
2007 jyly Ázerbaıjannyń bas shahary – Bakýde ótken dúnıejúzilik dodada Elena Shalygına (63 kg) kúmis alsa, Olga Smırnova (55 kg) men Olga Jánibekova (72 kg) qola medal ıelendi. Elenany altyn medaldan dańqy jer jarǵan Kaorı Itıo aıyrdy. Olımpııa oıyndarynyń tórt dúrkin jeńimpazy, álemniń 10 dúrkin chempıony atanǵan Japonııa juldyzy otandasymyzǵa esh múmkindik bermedi. Desek te osy jarystan keıin álemdegi eń beldi degen balýandar qazaq qyzdarynan qaımyǵatyn boldy.
2008 jyly Tokıoda Juldyz Eshimova (48 kg) erledi. Fınalda amerıkalyq Klarıssa Chýnǵa jol bergen ol kúmis medaldy moınynda jarqyratty. 2009 jyly Danııanyń Hernınginde Elena Shalygına (63 kg) qolany qorjynǵa saldy. 2010 jyly Máskeýde dál sol E.Shalygına ekinshi oryndy enshiledi. Bul joly ol fınalda álemniń eki dúrkin chempıony, úsh dúrkin qola júldegeri Martına Dıýgreneden jeńildi. 2011 jyly Ystanbulda J.Eshimova úshinshi satyǵa jaıǵasty. 2012 jyly Albertada Gıýzel Manıýrovanyń (72 kg) altynnan alqa taǵýǵa jaqsy múmkindigi boldy. Alaıda fınalda shvesııalyq Iennı Fransson oǵan shań qaptyryp ketti. 2013 jyly Býdapeshtte Ekaterına Larıonova (63 kg), 2016 jyly Aıym Ábdildına (55 kg), 2019 jyly Astanada Valentına Islamova (50 kg) úshinshi oryn ıelendi.
Keıingi tórt álem chempıonatynda Jámıla Baqbergenovanyń (72 kg) ǵana baq juldyzy jandy. Ol úsh jarystyń fınalynda kúsh synasyp, barlyǵynda kúmis medal ıelendi. 2021 jyly Osloda ol japonııalyq Masako Fýrýıtıden, 2022 jyly Býdapeshtte amerıkalyq Emıt Elordan, 2024 jyly Tıranada Japonııa eliniń taǵy bir sulýy Amı Isııden aılasyn asyra almady. 2023 jyly Jámılıa Majarstannyń astanasynda qola júldeni qanaǵat tutty.
Áıelder kúresinen elimizdiń quramasy 15 júlde aldy. Onyń 7-eýi kúmis, 8-i qola. О́kinishke qaraı, áli kúnge deıin bizdiń burymdylarǵa altyn alqa buıyrmady. Sol olqylyqtyń orny 13–21 qyrkúıek aralyǵynda Horvatııa astanasy Zagrebte jalaýy jelbireıtin álem chempıonatynda tolady dep úmittenemiz.
1993–2025 jyldar aralyǵynda ótken álem chempıonattarynda eń kóp altyndy Japonııa quramasy jeńip aldy. Kúnshyǵys eliniń arýlary 93 márte altynnan alqa taqty. Ekinshi, úshinshi oryndarda – AQSh pen Qytaı. Amerıkalyqtar 22, Qytaı eliniń burymdylary 19 ret bas júldeni oljalady. Odan keıingi oryndarda: Kanada – 11, Ýkraına – 10, Fransııa, Bolgarııa – 7, Reseı – 6, Aýstrııa – 5, Mońǵolııa, Norvegııa, Qyrǵyzstan – 4, Shvesııa, Ázerbaıjan, Túrkııa, Polsha – 3, Germanııa, Belarýs, Moldova – 2, Soltústik Koreıa, Grekııa, Majarstan, Fınlıandııa – 1.