«Amanat» partııasynyń Aqmola oblystyq fılıalynda jol kartasynyń oryndalmaı qalý qaýpine baılanysty depýtattyq fraksııanyń otyrysy ótti, dep habarlaıdy Egemen.kz.
Otyrys barysynda Aqmola oblysy ákiminiń orynbasary Ernar Járkeshov «Amanat» partııasynyń «Halyqpen birge!» 2023-2027 jyldarǵa arnalǵan saılaýaldy baǵdarlamasyn iske asyrý jónindegi jol kartasynyń oryndalýy jaıly baıandady. Jol kartasy birneshe baǵyt boıynsha júzege asyrylyp jatyr.
–Oblysta júıeli jumys atqarylyp jatyr, – deıdi oblys ákiminiń orynbasary Ernar Járkeshov, –Astana aglomerasııaǵa kiretin ındýstrııalyq aımaq Arshaly aýdanynda jumys istep bastadyq. Oǵan biz sheteldik jáne qazaqstandyq ınvestorlardyń ishinen 1 trıllıon 100 mıllıard teńgege jýyq ınvestısııalyq jobalardy tartyp, ornyqtyryp jatyrmyz. Ol jerge biz biraz elektr qýatyn, sý qubyrlaryn tartyp, daıyndap qoıdyq. Endi qurylystar birte-birte bastalyp jatyr. Odan basqa «KóksheInvestor» degen ındýstrııalyq aımaqty ashtyq. Onyń eń basty maqsaty bizdiń Kókshetaýdyń áleýetin jalpy geografııalyq jaǵynan qandaı utymdy jaǵdaılar bar sony eskere otyryp, transporttyq-logıstıkalyq hab retinde tereń óńdeýge baılanysty jobalardy ashtyq.
Selınograd jáne Arshaly aýdandary elordaǵa jaqyn bolǵandyqtan bul óńirlerdiń damýyna erekshe ekpin berilip otyr. Alaıda, shalǵaıda jatqan eldimeken turǵyndarynyń jaǵdaıy máz emes. Máselen, Ereımentaý aýdanynyń halqy uzaq jyl sapaly aýyz sýǵa jarymaı keledi. Oǵan qosa, joldyń jaı-kúıi de alańdatyp otyr. Sol sebepti aýyl turǵyndarynyń eldimekennen jappaı kóshý tendensııasy baıqalady. Jıyn barysynda oblystyq máslıhattyń depýtaty Bekim Ákimov óńir turǵyndaryn tolǵandyryp júrgen máseleni kópshilik talqysyna saldy.
–Aýyl halqynyń údere kóship jatqandyǵy shyndyq. Erteń aýyl sharýashylyǵymen aınalysatyn qojalyqtarda jumysshy qalmaıdy, – dedi oblystyq máslıhattyń depýtaty Bekim Ákimov, – aldymen aýylǵa jaǵdaı jasalý kerek.
«Jaıly mektep» baǵdarlamasy aıasynda boı kótergen bilim oshaqtary da jıyn barysynda talqylandy. Keler jyly mektepter úsh aýysymdy bilim berý júıesine qaıtadan oralýy múmkin. Sebebi, shalǵaıdaǵy bilim ordalarynyń jaǵdaıy múshkil.
Aqmola oblysy