Agroónerkásipti damytý – jurtty jumyspen qamtý

Keshe Ortalyq kommýnıkasııalar qyzmetinde «QazAgro» ulttyq basqarýshy kompanııasy» AQ basqarma tóraǵasynyń mindetin atqarýshy Dáýren Maqajanov baspasóz máslıhatyn ótkizdi. Ol holdıngtiń ótken jyly atqarǵan jumystary týraly aıtyp, aldaǵy josparlarymen bólisti. Jyl qorytyndysyna qaraǵanda, «QazAgro» agroónerkásip keshenin qarjylandyrýǵa byltyr 222 mlrd. teńge kóleminde aqsha salypty. «О́tken jyly agroónerkásip keshenindegi sýbektilerdi qarjylaı saýyqtyryp, qoldaýǵa jáne ınvestısııalyq jobalardy júzege asyryp, sharýalardyń tehnıkasyn jańartýda kóp jumys atqardyq. Nesıeni tek qana teńgemen berýge úlken táýekel kerek boldy. Munymen birge, naq bir jyl buryn teńge baǵamyna túzetý jasaldy. Soǵan qaramastan holdıng jyldy 5,7 mlrd. teńge kóleminde paıdamen qorytyndylady. Byltyr salany qarjylandyrýǵa 222 mlrd. teńge jumsaldy. Bul 2013 jylmen salystyrǵanda 15 paıyzǵa artyq ekenin aıtqym keledi», dedi D.Maqajanov. Spıkerdiń sózine sensek, agroónerkásip keshenin damytýǵa arnalǵan sharalardyń arqasynda 41,2 myń adam jumyspen qam­tylypty. Holdıngte Memleket basshysynyń taıaýda bergen tapsyrmasyn oryndaý isi de tyńǵylyqty júrgizilip jatyr eken. Naqty kórseter bolsaq, «QazAgro» 559 mln. teńge kóleminde tıimsiz shyǵystardy qys­qartýdy kózdep otyrǵan kórinedi. Shy­ǵystardy ońtaılandyrýǵa baılanysty beıinsiz aktıvterdi qysqartý josparda tur. Buıyrtsa, bıyl 559 mln. teńge kóleminde tıimsiz shyǵystardy qysqartamyz. Ol boıynsha biriniń jumysyn ekinshisi qaıtalap otyrǵan bólimder men qyzmetkerler jumystan bosatylady. Shamamen 93-ten 73 adamǵa deıin qysqartý kózdelgen. Nátıjesinde, ákimshilik shy­ǵyndar 194,7 mln. teńgege, ıaǵnı 12 paıyz­ǵa qysqarady», dedi ol. Áıtkenmen, agroónerkásipti damytqan saıyn, adamdardy jumys­pen qamtý múmkindigi arta beretinin de meńzedi. Holdıng aǵymdaǵy jyly 15 ınvestı­sııalyq jobany paıdalanýǵa beredi eken. «Negizi, holdıngtiń ınvestısııalyq qorjy­nynda 477 joba bar. Olardyń jalpy quny 309,1 mlrd. teńgege teń. Nazar salsańyzdar, búginge deıin 365 joba iske qosylyp, onyń 236-sy tolyq qýatynda jumys istep tur. Al bıyl 75 ınvestısııalyq joba­ny paıdalanýǵa berýdi oılap otyrmyz», dedi D.Maqajanov. «QazAgro» ınves­tı­sııalyq jobalarmen óńirlerdi qamtý sharasyn da birizdendirip, aýqymyn keńeı­tip keledi eken. Mysaly, ótken jylmen salystyrǵanda 28 aýdan jáne aýdandyq mańyzy bar alty qala jyldy artyq kór­setkishpen qorytyndylapty. Nurbaı ELMURATOV, «Egemen Qazaqstan».