Premer-mınıstr Oljas Bektenovtiń tóraǵalyǵymen ótken «Kazakh Tourism Development Ltd.» kompanııasynyń dırektorlar keńesinde «Almaty Superski» jobasynyń jańartylǵan jospary maquldandy.
Kompanııanyń bas atqarýshy dırektory Erjan Erkinbaev jobany álemge tanymal «Pas Grau International» kompanııasymen birge ázirlegenin aıtty. Josparǵa zamanaýı óndiristik tehnologııalardy qoldaný, relef pen klımattyq jaǵdaılardy spýtnıktik derekter arqyly zertteý, «jasyl» standarttardy engizý kirgen. Álemniń 120-dan astam taý shańǵysy kýrortynda synalǵan úzdik tájirıbeler negizge alynǵan.
«Pas Grau International» ókili Joan Vıladomat nysannyń megapolıske jaqyn ornalasýyn artyqshylyq retinde baǵalady. Onyń aıtýynsha, Almatydaǵy damyǵan qonaqúı men tamaqtaný oryndary, sondaı-aq kólik ınfraqurylymy kýrort aýmaǵynda artyq qurylys júrgizýdi qajet etpeıdi. Bul sheshim aımaqtyń tabıǵı kelbetin saqtaýǵa múmkindik beredi.
Jospardy daıyndaý barysynda ekologııaǵa erekshe nazar aýdaryldy. Qujatta ornyqty damý qaǵıdattary men halyqaralyq ekotýrızm standarttary eskerilgen. Aldaǵy ýaqytta joba Almatynyń qysqy demalys pen ekologııalyq týrızm ortalyǵy retindegi mártebesin nyǵaıtyp, qonaqúı bıznesine, kólik pen qyzmet kórsetý salasyna jańa ınvestısııalar ákeledi. Bul óz kezeginde shaǵyn jáne orta kásipkerliktiń damýyna serpin bermek.
Otyrys barysynda Premer-mınıstr qurylys kezinde ekologııalyq talaptardyń qatań saqtalýy kerektigin atap ótti.
«Almaty Superski» otandyq týrızmniń jańa qarqynyn qalyptastyryp, el ekonomıkasyn ártaraptandyrýǵa úles qospaq.