Almaty polısııasy almatylyq «Qaırat» pen madrıdtik «Real» arasyndaǵy ÝEFA aıasynda ótetin halyqaralyq fýtbol oıynyna saqadaı-saı daıyn ekenin habarlady. Match erteń, 30 qyrkúıekte ótedi. Bul shara búkil qala úshin úlken sport merekesine aınalyp, qaýipsizdik pen tártipke erekshe nazar aýdarýdy talap etedi, dep jazady Egemen.kz.
Qalalyq Polısııa departamentiniń baspasóz qyzmetiniń málimetinshe, quqyqtyq tártip pen qaýipsizdikti qamtamasyz etý úshin keshendi sharalar qabyldanǵan. Qoǵamdyq tártipti kúzetýge 2,5 myńnan astam qyzmetker tartylady. Negizgi mindetteri – jankúıerler men oıynǵa qatysýshylardyń qaýipsizdigin saqtaý, sondaı-aq jol qozǵalysyn retteý.
«Qymbatty almatylyqtar, qadirli qonaqtar! Erteń qalamyzda «Qaırat – Real Madrıd» arasyndaǵy halyqaralyq fýtbol matchy ótip, úlken oqıǵanyń ordasyna aınalady. Biz álemniń túkpir-túkpirinen kelgen jankúıerlerdi kórgenimizge qýanyshtymyz. Bul biz úshin sport merekesi ǵana emes, Almatynyń shynaıy kelbetin – qonaqjaılyǵyn, qurmetin jáne joǵary mádenıetin kórsetýge úlken múmkindik», — dedi Almaty qalalyq PD Jergilikti polısııa qyzmeti basqarmasy bastyǵynyń orynbasary Tımýr Noǵaıbaev.
Quqyq qorǵaý ókili match kúni qozǵalysqa ishinara shekteýler engiziletinin atap ótti. Bılik turǵyndardan marshrýttaryn aldyn ala josparlaýdy, ýaqytsha is-sharaǵa túsinistikpen qaraýdy jáne kóshede, kólikte ári stadıonda tártipti qatań saqtaýdy suraıdy.
«Komandany qoldańyzdar, biraq mádenıetti túrde. Qalamyzdy taza ustaıyq, bir-birimizge jáne qonaqtarǵa qurmetpen qaraıyq. Sol arqyly Almaty men búkil elimizdiń ımıdjine úles qosamyz», — dedi ol.
Almatylyq «Qaırattyń» qarsylasy – madrıdtik «Realdyń» fýtbolshylary Almatyǵa keldi. Olardyń sapary fýtbol jankúıerleri úshin úlken oqıǵa boldy: áýejaıda aty ańyzǵa aınalǵan oıynshylardy óz kózimen kórýge asyqqan jankúıer men jýrnalıstiń qarasy qalyń.