Medısınadaǵy sıfrlandyrý úderisi búginde jańa deńgeıge shyǵyp jatyr. Stýdentterden quralǵan «Enactus» komandasy jasandy ıntellekt negizindegi telemedısınalyq júıe jasap, ony tájirıbege engizýdi bastady. Bul joba dáriger men pasıent arasyndaǵy baılanysty jeńildetip qana qoımaı, dıagnozdy dál qoıady, dep jazady Egemen.kz.
Jańa júıeniń ereksheligi – jasandy ıntellekt dáriger men naýqastyń arasyndaǵy «kómekshi» rólin atqarady. Naýqas aýrý belgilerin engizgende, baǵdarlama olardy taldap, yqtımal aýrý túrlerin qarapaıym tilde túsindiredi. Mysaly, «bas aýrýy» nemese «qyzý» sııaqty sımptomdar jazylsa, júıe olardyń sebepterin túsindirip, ári qaraıǵy qadamdardy usynady. Eger jaǵdaıdyń shuǵyl ekenin anyqtasa, jedel járdem shaqyrý qajettigin habarlaıdy. Bul – naýqastardyń belgilerin durys sıpattaı almaýynan týyndaıtyn qatelikterdi azaıtyp, shuǵyl kómektiń ýaqytyly jetýine jol ashady.
Joba avtorlarynyń aıtýynsha, jasandy ıntellekt tek resmı medısınalyq hattamalar men halyqaralyq nusqaýlyqtarǵa súıenip jumys isteıdi. Internettegi beıresmı aqparatty qoldanbaıdy. «Bizdiń maqsat – dıagnostıka sapasyn arttyryp, dárigerdiń jumysyn jeńildetý. Qazirgi kórsetkish boıynsha júıeniń dáldigi 98 paıyzǵa jetip otyr. Aldaǵy ýaqytta platformaǵa naýqastyń aýrý tarıhy, taldaý nátıjeleri, resepti men emdeý jospary engizilip, barlyǵy bir jerden qoljetimdi bolady», – deıdi jobany ázirleýshiler.
Júıe tek bastapqy dıagnostıkamen shektelmeıdi. Onda beıne-keńes múmkindigi bar. Naýqas táýliktiń kez kelgen ýaqytynda kezekshi dárigermen baılanysyp, alǵashqy keńes ala alady. Bul jedel járdem jetkenge deıin durys áreket jasaýǵa kómektesedi. Al dáriger úshin jasandy ıntellekt pasıenttiń shaǵymdaryn júıelep, aldyn ala medısınalyq esep daıyndaıdy. Bul ýaqyt únemdeýge, qujat aınalymyn jeńildetýge jáne qatelikti azaıtýǵa múmkindik beredi.