Prezıdenttiń sıfrlandyrý men jasandy ıntellektti damytý jónindegi tapsyrmasyn iske asyrý barysynda Almatyda ekologııalyq óndiris pen sıfrlyq tehnologııa damyp keledi, dep jazady Egemen.kz.
Qazirgi kezde qalada jasandy ıntellekt pen «jasyl» ekonomıkany damytý baǵytyndaǵy is-sharalar qolǵa alynǵan. Qala ákimi Darhan Satybaldy jumys sapary aıasynda shahardyń iri kásiporyndarynyń biri «Caspian Beverage Holding» aksıonerlik qoǵamynyń jumysymen tanysyp, MOST IT Hub Almaty ınnovasııalyq alańyna bardy.
Caspian Beverage Holding zaýyty 1964 jyly ashylǵan. Qala basshysy óndiristik úderister men kásiporynnyń ekologııalyq bastamalarymen tanysty. Qazirgi kezde kompanııa táýligine 500 myńǵa deıin sýsyn bótelkesin shyǵarady. Zaýytta 500 adam jumys isteıdi. Kompanııanyń jyl saıyn tóleıtin salyǵy shamamen 2 mlrd teńge. Kásiporyn ornyqty damý tehnologııasyn belsendi túrde engizip keledi. Sonyń biri aýaǵa taraıtyn zııandy shyǵaryndylardy edáýir azaıtýǵa múmkindik beretin kómirqyshqyl gazyn qaıta óńdeý tuıyq sıkli. Qala basshysy atap ótkendeı, ekologııalyq jaýapkershiligi joǵary mundaı óndirister qalanyń ekonomıkalyq damýyna jáne tabıǵatty aıalaýǵa negizdelgen «jasyl ekonomıkanyń» órkendeýine eleýli úles qosady.
MOST IT Hub Almaty – startaptar men tehnologııalyq kásipkerlikti damytýǵa arnalǵan zamanaýı ınnovasııalyq ortalyq. Habta ınnovasııalyq jáne ǵylymı jobalardy júzege asyrýǵa baǵyttalǵan 80-nen astam IT-kompanııa shoǵyrlanǵan. Munda akselerasııalyq jáne bilim berý baǵdarlamalary, venchýrlyq bastamalar men jasandy ıntellekt zerthanalary jumys isteıdi.
Kezdesýde qala basshysy IT-salany jáne jasandy ıntellekt tehnologııalaryn damytý – Prezıdent aıqyndaǵan negizgi basymdyqtardyń biri ekenin atap ótip, «Memleket basshysynyń sıfrlandyrý men jasandy ıntellektti damytý jónindegi tapsyrmalary aıasynda eń bastysy, startaptardy ǵana emes, ómir sapasyn jaqsartatyn, Almatyny aqyldy, yńǵaıly ári qaýipsiz qalaǵa aınaldyratyn naqty sheshimderdi engizý. Biz qala men turǵyndarǵa paıda ákeletin IT-jobalardy qoldaýǵa daıynbyz» dedi. О́nerkásip pen IT-sektor turaqty damýdyń negizgi qozǵaýshy kúshi. Jańa jumys oryndaryn ashýǵa yqpal etip, ınvestısııa tartyp, megapolıstiń tehnologııalyq áleýetin arttyrýǵa múmkindik beredi.
ALMATY