Shymkentte jyl basynan beri jiti respıratorlyq vırýstyq ınfeksııalar (JRVI), tumaý men COVID-19 indetine qatysty epıdemıologııalyq jaǵdaı turaqty. Bul týraly óńirlik kommýnıkasııalar qyzmetinde ótken brıfıngte qalalyq sanıtarııalyq-epıdemıologııalyq baqylaý departamenti basshysynyń orynbasary Aıgúl Turymbetova málimdedi.
Mamannyń aıtýynsha, 9 aı ishinde 84 myńnan astam adam JRVI-men aýyrǵan. Onyń kópshiligi balalar. Úsh júzden astam adam tumaýǵa shaldyǵyp, kópshiligi A, V tıpterin juqtyrǵan. Eki júzden astam naýqas tumaýǵa jatpaıtyn vırýstyq dertke ushyraǵan. Olardyń ishinde paragrıpp, rınovırýs, adenovırýs, koronavırýs bar.
Sanepıdemıologııalyq qyzmet ókiliniń málimdeýinshe, ınfeksııanyń aldyn alý maqsatynda jergilikti bıýdjet esebinen tumaýǵa qarsy tez juqtyratyndar tobyna jatatyn tulǵalarǵa ekpe júrgizýge 150 000 doza «Grıppol+» vaksınasy satyp alyndy. Megapolıs turǵyndarynyń vaksınamen qamtylý deńgeıi 12% quraıdy. Shymkentte tumaýǵa qarsy vaksına egý jumystary qyrkúıek aıynyń sońynda bastaldy. Birinshi kezekte medısına uıymynyń qyzmetkerleri, muǵalimder, dıspanserlik esepte turǵan, jetim, ata-anasynyń qamqorlyǵynsyz qalǵan balalar, sondaı-aq áskerı qyzmetshiler men sozylmaly tynys alý joldary aýrýymen, júrek qan-tamyr dertimen aýyratyndar egildi. Negizinen ártúrli tumaýmen aýyratyn kezeń qazan men sáýir aılaryn qamtıdy. Osyǵan baılanysty qalada daıyndyq jumystary qolǵa alyndy. Emhanalarda naýqastarǵa keńes beretin qosymsha telefon nómirleri iske qosyldy. 71 avtokólik, úsh júzden astam tósek-oryn qarastyryldy. Juqpaly aýrýlar aýrýhanasynyń tumaýmen túskender jatatyn bólimshesi 100 tósek-orynǵa ulǵaıdy. Infeksııalyq indet júretin kezeńde onymen kúresýge jetkilikti deńgeıde dári-dármek qory jınaqtaldy. Elimizdiń bas memlekettik sanıtarııalyq dárigeriniń qaýlysyna saı, 1 qazannan bastap medısınalyq uıymdarda betperde taǵý tártibi engizildi. Osy qaýlyǵa sáıkes Shymkenttegi mektepterde tumaýdyń oqýshylar arasynda taralýyn boldyrmaý maqsatynda tańerteńgilik súzgi kezekshiligi qolǵa alyndy. Osy profılaktıkalyq is-shara aıasynda tumaý belgisi bar oqýshylardy erte anyqtaý jumystary júrgizildi.
«Eger bir synypta oqıtyn oqýshylardyń jartysyna jýyǵy tumaýmen aýyrsa, onda oqýshylar onlaın sabaqqa kóshedi. Jalpy, JRVI men tumaý belgileri uqsas bolyp keledi. Ekeýinde de dene qyzýy kóterilip, tamaq qyzaryp, álsizdik paıda bolady. Biraq ekeýiniń de asqynýy densaýlyqqa aýyr tııýi múmkin. Tumaýdyń saldarynan aýrý pnevmonııa, menıngıt, otıt, gaımorıt sekildi aýrýlarǵa ulasyp ketýi yqtımal. Keıde tumaýdyń aýyr túrine shaldyqsa, adam ólip te ketedi. Sondyqtan juqpaly indettiń aldyn alýdyń eń tıimdi joly – ekpe saldyrý. Ol pasıentterge barlyq emhanada qoljetimdi», dedi A.Turymbetova.
Brıfıng barysynda sóz alǵan qalalyq juqpaly aýrýlar aýrýhanasy bas dárigeriniń mindetin atqarýshy Murat Aǵabaev bıyl jyl basynan beri qutyrý aýrýy jóninde eshqandaı derek tirkelmegenin málimdedi. Bul der kezinde atqarylǵan profılaktıkalyq jumystardyń nátıjesi dedi maman. Degenmen qalada ıt-mysyq tistegen nemese tyrnaǵan oqıǵalar bolǵan. Biraq olardyń eshqaısysy qutyrý saldaryna kirgen joq. It-mysyqtan zábir kórgenderdiń teń jartysy balalar. Mamannyń aıtýynsha, qutyrý dertine qarsy aldyn alý sharalary turaqty túrde júrgizilip keledi.