Úkimet otyrysynda tótenshe jaǵdaılarǵa jedel den qoıýdy arttyrý sharalaryn qabyldaý jumystary týraly sala mınıstri Shyńǵys Arynov baıandady, dep habarlaıdy Egemen.kz.
Ol tótenshe jaǵdaılarǵa monıtorıng júrgizip otyrý úshin jasandy ıntellekt arqyly taldaý jáne geoaqparattyq júıeler engizilgenin atap ótti.
Barlyq aımaqtarda órt sóndirý depolary men qutqarý stansııalaryn salý- jańartý jumystary qarqyndy júrgizilip jatyr. Mysaldap aıtqanda 25 órt sóndirý deposy men qutqarý stansasy salynyp, 196 nysan qaıta jańǵyrtylǵan. Jyl sońyna deıin taǵy 23 órt sóndirý bóliminiń qurylysyn aıaqtaý josparlanyp otyr.
«Tótenshe jaǵdaılar kezinde halyqqa keshendi kómek kórsetý úshin órt sóndirýshilerden, qutqarýshylar men dárigerlerden turatyn ámbebap bólimsheler quryldy. Osyndaı 5 bólimshe Arshaly, Makınsk, Maıtóbe, Aqqýly, Qarqaraly eldi mekenderinde jumys istep jatyr. Atalǵan joba elimizdiń barlyq óńirlerinde kezeń-kezeńimen iske qosylatyn bolady», dedi Sh.Arynov.
Úkimettiń baspasóz qyzmetinen habarlanǵandaı, Premer-mınıstr órtke qarsy erejelerdi buzǵany úshin tıimdi sharalar qabyldaýdy tapsyrdy.
Jalpy elimizdiń turǵyn úı sektorynda órt oqıǵalarynyń sany azaıǵan. Biraq Atyraý, Aqmola, Jambyl, Pavlodar oblystarynda onyń óskeni tirkeldi.
«Negizgi sebep – halyqtyń pesh jaǵý, sondaı-aq gazben jáne elektrmen jylytý júıelerin qoldaný kezinde qarapaıym qaýipsizdik talaptarynyń saqtalmaýy. О́rtke qarsy erejelerdi buzǵany úshin tıimdi sharalar qabyldaý qajet. Tótenshe jaǵdaılar mınıstrligi órt qaýipsizdigi salasynda túsindirý jáne aldyn alý jumystaryn kúsheıtýi kerek», dep atap ótti Oljas Bektenov.
Premer-mınıstr eriktiler men qoǵam ókilderin jumyldyra otyryp, halyqtyń qaýipsizdik salasyndaǵy mádenıetin arttyrý úshin túsindirý jumystaryn jandandyrý qajettigine nazar aýdardy. Sondaı-aq bilim oshaqtarynda órt qaýipsizdigi boıynsha ınteraktıvti sabaqtar ótkizý kerek.
Premer-mınıstr demalys jáne mereke kúnderi turǵyn úı sektorynda reıdter júrgizip, jylytý peshterin tekserý qajettigin atap ótti. Bul iske ákimdik qyzmetteri men Ishki ister mınıstrliginiń qyzmetkerlerin de tartý kerek.
«Reıdtik tekserý barysynda órt shyǵý qaýpi bar jáne jylytý júıesi durys jumys istemeıtin úıler anyqtalýǵa tıis. Atalǵan faktiler bolǵan jaǵdaıda olardy joıý boıynsha jedel sharalar qabyldaǵan jón. Sonymen qatar Tótenshe jaǵdaılar mınıstrligi tek resmı usynymdar berýmen shektelip qalmaýy kerek. Bul – eń aldymen adamdardyń qaýipsizdigine qatysty másele, sondyqtan óte naqty ári úılesimdi jumys qajet», dep atap ótti Oljas Bektenov.
Oljas Bektenov órttiń basym bóligi áleýmettik turǵydan az qamtylǵan azamattardyń úılerinde bolatynyna nazar aýdardy.
«Máselen, ótken jylytý maýsymynda órtten qaza tapqandardyń deni – zeınetkerler, jumyssyzdar, múgedektigi bar adamdar. О́ńir ákimdikterine Tótenshe jaǵdaılar mınıstrligimen jáne Eńbek mınıstrligimen birlesip, bir aı ishinde halyqtyń áleýmettik osal toptary turatyn úılerdiń tizimin naqtylaýdy tapsyramyn. О́ńir ákimdikteri osy sanattaǵy adamdardyń úılerin erekshe baqylaýda ustap, olarǵa qajetti qoldaý kórsetsin», dep atap ótti Premer-mınıstr.