Elimizdegi alǵashqy atom elektr stansasyna ataý berý konkýrsyna 27 000-nan astam adam qatysty, dep habarlaıdy Egemen.kz.
Baıqaý osy jylǵy 25 qyrkúıekte saǵat 12:00-de eGov Mobile mobıldi qosymshasynda bastalǵan bolatyn. Eki apta ishinde – 10 qazan, saǵat 23:59-ǵa deıin qazaqstandyqtar 27 myńnan astam usynys joldady. Mundaı joǵary belsendilik azamattardyń atom energetıkasyn damytýǵa degen zor qyzyǵýshylyǵyn ári el úshin mańyzdy jobaǵa jeke úles qosýǵa daıyn ekenin kórsetedi.
Qazirgi ýaqytta kelip túsken usynystardy óńdeý prosesi bastaldy. Alǵashqy kezeńde mamandar barlyq nusqalardy taldap, júıeleý jumystaryn júrgizedi, sóıtip jıyntyq esep daıyndaıdy. Keıin materıaldar Konkýrs komıssııasynyń músheleri tarapynan qaralady. Qorytyndy kezeńde qazan aıynyń sońynda, komıssııa otyrysy ótkizilip, alǵashqy AES-ke úzdik ataý tańdalady.
Elimizdiń Atom energııasy jónindegi agenttiginde baıqaý memleket pen azamattyq qoǵam arasyndaǵy ashyq ózara is-qımyldyń úlgisi ári joǵary qoǵamdyq belsendiliktiń kórinisi bolǵany atap ótiledi.
Bolashaq stansanyń qorytyndy ataýy komıssııanyń sheshimi boıynsha jarııalanyp, otandyq energetıkany damytýdyń jańa kezeńiniń sımvolyna aınalady.