Bıylǵy jyldyń alǵashqy toǵyz aıynyń qorytyndysy boıynsha temeki ónimderinen túsetin aksızdik túsimderdiń ósim qarqyny ótken jyldyń sáıkes kezeńimen salystyrǵanda 121%-dy qurady. Bul bıýdjetke qosymsha 35,6 mlrd teńge kóleminde kiris ákeldi, dep habarlaıdy Egemen.kz.
Bıyldyń alǵashqy bes aıynyń qorytyndysy boıynsha aksızdik túsimderdiń ósimi ótken jyldyń sáıkes kezeńimen salystyrǵanda 121,7%-dy qurady. Bul bıýdjetke qosymsha 21,4 mlrd teńge túsim ákeldi. Tańbalaý júıesi kóleńkeli naryqpen kúreste de joǵary tıimdiligin kórsetti. Byltyr 12,8 mlrd teńgeden astam somaǵa zańsyz saýda aınalymdaǵy shamamen 5 mln qorap temeki ónimi anyqtaldy. Bul kórsetkish burnaǵy jylmen salystyrǵanda 28%-ǵa joǵary.
«Sonymen qatar, sıfrlyq tańbalaý júıesi taýar aınalymynyń tizbegindegi sáıkessizdikterdi anyqtaýǵa múmkindik beredi ári salyq pen keden organdaryna qosymsha taldamalyq quraldar usynady. Júıeni kezeń-kezeńimen keńeıtý jumystary jalǵasýda. Jaqyn arada syra jáne syra ónimderin tańbalaý engiziledi. Bul naryqtyń taǵy bir iri segmentin qamtyp, onyń tolyq qadaǵalanýyn qamtamasyz etedi», dedi Qarjy mınıstrligi Memlekettik kirister komıtetiniń Salyqtyq basqarý departamenti dırektorynyń mindetin atqarýshy Bektas Adılgalıev Digital Tañba forýmynda sóılegen sózinde.
Elimizde temeki ónimderin mindetti tańbalaý 2020 jyldyń 1 qazanynan bastap engizildi. Búgingi tańda tańbalaý aqparattyq júıesinde temeki ónimderiniń aınalymyna qatysýshy 55 myńnan astam sýbekt tirkelgen, al temeki qoraptaryna 6,1 mıllıardtan astam tańbalaý kody qoldanylǵan.
Aıta keteıik, árbir qazaqstandyq ónimniń túpnusqalyǵyn jáne zańdylyǵyn tekserý úshin oramdaǵy kodty Naqty Onim tegin mobıldi qosymshasy arqyly skanerleı alady. Eger kod jalǵan bolyp shyqsa nemese múlde bolmasa – bul jóninde zańbuzýshylyq retinde habarlaýǵa bolady.