Búgin Májiliste Premer-mınıstr Oljas Bektenov pen Úkimet músheleriniń qatysýymen plenarlyq otyrys ótti. Bul týraly saıasatker Rasýl Qospanov óziniń Telegram-arnasynda jazdy, dep habarlaıdy Egemen.kz.
«Kún tártibinde 2026–2028 jyldarǵa arnalǵan respýblıkalyq bıýdjet jobasy, ortalyq pen óńirler arasyndaǵy transfertter týraly zań jobasy qaraldy. Bul jyldyń mańyzdy otyrystarynyń biri, sondyqtan men, О́ńirlik taldaý ortalyǵynyń aǵa zertteýshisi retinde, óńirlik aspektisine erekshe nazar aýdardym», dep jazady Telegram-arna avtory.
Qazirgi tańda Qazaqstanda jıyrma óńirdiń úsheýi ǵana – Almaty, Astana jáne Atyraý oblysy – respýblıkalyq bıýdjet donorlary bolyp keledi. Qalǵan óńirler óz kiristeri jetpegendikten, ortalyqtan bólinetin transfertter esebinen ómir súrýde. Bıýdjet jobasyna sáıkes, jergilikti bıýdjetterdiń respýblıkalyq transfertterge táýeldiligi 50%-dan 33%-ǵa deıin tómendeıdi. 2028 jylǵa qaraı Pavlodar oblysy tolyq ózin-ózi qamtamasyz etetin óńirge aınalyp, Mańǵystaý oblysy qaıtadan donor bolmaq.
2026–2028 jyldary óńirlerdi damytýǵa 581 mlrd teńge bólý josparlanǵan, onyń ishinde 300 mlrd teńgesi – kelesi jylǵa arnalǵan. Sonymen qatar, óńirlerge 5,1 trln teńge kóleminde transfert bólinedi. Bul qarajattyń artta qalǵan oblystardyń ınfraqurylymyn – jol, sý, mektep jáne medısına salalaryn damytýǵa baǵyttalýy asa mańyzdy.
О́ńirlerden Astana men Almatyǵa ishki kóshi-qonnyń aýqymy edáýir ulǵaıǵan. Qazaqtardyń jaqsy ómir izdep elorda men megapolıske qonys aýdarýy qupııa emes. Sol sebepti memleket óńirlerde de qolaıly ómir súrý jaǵdaılaryn jasaýǵa tıis.
О́ńirlerdiń basty máselesi tek qarjy tapshylyǵynda emes, basqarý sapasynda da. Eger jergilikti ákimdikter bólingen qarajatty tıimdi ıgere almasa, bul mıllıardtar qaǵaz júzinde ǵana qalýy múmkin. Sondyqtan óńirlerdiń óz damý úderisin basqarý qabiletin arttyrý mańyzdy. Atrofııaǵa ushyraǵan máslıhattar men qoǵamdyq keńester jaǵdaıynda bul mindetti júzege asyrý qıyn.
«Soǵan qaramastan, qazirgi bıýdjettik sıkl durys baǵytty aıqyndap otyr — óńirlerge kóbirek derbestik berý, ınfraqurylym men naqty sektordy damytýǵa basymdyq jasaý. Eń bastysy – saıası málimdemelerdiń artynan naqty nátıjeler ilesýi kerek», dep túıindedi Rasýl Qospanov.