Qaraqııa aýdanynyń Munaıshy jáne Jetibaı aýyldarynda angar tıpindegi jańa sport zaldardyń saltanatty ashylý rásimi ótti, dep habarlaıdy Egemen.kz.
Atalǵan sport zaldar aýyl jastary men turǵyndarynyń salaýatty ómir saltyn ustanýyna jáne buqaralyq sportty damytýǵa múmkindik beredi. Ár nysannyń jalpy aýmaǵy – 1488 sharshy metr, bir mezette 50 adamǵa deıin qabyldaı alady. Zalda kúres túrleri, fýtbol, voleıbol jáne basketbol boıynsha úıirmeler jumys istemek.
Saltanatty is-shara barysynda oblys ákimi Nurdáýlet Qılybaı turǵyndardy jańa sport zaldardyń ashylýymen quttyqtap, bul nysandardyń aýyl jastarynyń bos ýaqytyn tıimdi ótkizýine jáne olardyń sportqa qyzyǵýshylyǵyn arttyrýǵa zor yqpal etetinin atap ótti.
«Memleket basshysy Qasym-Jomart Toqaevtyń tapsyrmasyna sáıkes, óńirlerde buqaralyq sportty damytýǵa jáne jastardy sportqa tartýǵa erekshe nazar aýdarylyp keledi. Búgin ashylyp otyrǵan zaldar – sonyń nátıjesi. Osyndaı zamanaýı sport nysandary arqyly aýyl jastarynyń densaýlyǵy nyǵaıyp, el namysyn qorǵaıtyn jańa chempıondar ósip shyǵady dep senemin», dedi aımaq basshysy.
Bıyl oblys ákiminiń tapsyrmasyna sáıkes Jetibaı aýylynda tuńǵysh ret balalar men jasóspirimderge arnalǵan sport mektebi quryldy. Aldaǵy ýaqytta atalǵan eki sport nysany osy memlekettik mekemeniń teńgerimine beriletin bolady.
Mańǵystaý oblysy