Májilistiń jalpy otyrysynda tarıhı-mádenı mura obektilerin qorǵaýǵa arnalǵan zań jobasy qaraldy. Qujatty tanystyrǵan depýtat Ashat Aımaǵambetov elimizde alǵash ret arheologııalyq materıaldardyń memlekettik qory qurylatynyn aıtty, dep habarlaıdy Egemen.kz.
Depýtattyń aıtýynsha, búginde arheologııalyq qazbalar kezinde tabylǵan kóptegen jádigerlerdiń taǵdyry beımálim. Keıbiri qoımalarda rettelmeı saqtalyp, endi biri joǵalyp ketken nemese esepke alynbaǵan. Osy olqylyqtyń ornyn toltyrý úshin arheologııalyq materıaldardy júıeli túrde saqtaıtyn biryńǵaı memlekettik qor jasaqtalady.
«Endi biz arheologııalyq materıaldardyń memlekettik qoryn jasaımyz. Mýzeılik qundylyǵy bar jeke jádigerler zańda bekitilgendeı mýzeıge beriledi. Al jappaı jádigerler men tabylǵan materıaldar – depozıtarııde, ǵylymı ortaǵa ashyq, qaýipsiz jaǵdaıda saqtalady. Bul sheshim – arheologııalyq muranyń saqtalýyna múmkindik beredi», dedi Ashat Aımaǵambetov.
Sonymen qatar zań jobasynda arheologııalyq qazba jumystary aıaqtalǵan soń nysandardy óz qalpyna keltirý jáne qorshaǵan ortany qaıta jóndeý talaptary engizilmek.
«Keı arheologııalyq jumystardan keıin qazba orny jabylmaıdy, rekýltıvasııa tolyǵymen jasalmaıdy. Tipti eskertkishterdiń ózi búlinedi. Jobada árbir arheolog qazbadan keıin jerdi qalpyna keltirý týraly, ıaǵnı konservasııa-rekýltıvasııa jumystaryn júrgizý boıynsha talaptar naqtylanady», dep túsindirdi depýtat.