Kitaphanashylar kúni qarsańynda L.N.Gýmılev atyndaǵy Eýrazııa ulttyq ýnıversıtetiniń Ǵylymı kitaphanasynda dástúrli «Úzdik kitaphanashy – 2025» baıqaýy ótti.
Kitaphanashy mamandyǵynyń mártebesin kóterý, shyǵarmashylyq bastamalaryn qoldaý maqsatynda ótkizilgen is-sharaǵa ýnıversıtettiń professor-oqytýshylar quramy, stýdentter men kitaphana qyzmetkerleri qatysty.
Baıqaý ujym jastarynyń zamanaýı bıimen bastalyp, Ǵylymı kitaphana dırektory Baqytjan Ásetildaulynyń quttyqtaýyna ulasty. «Bilimniń qaınar kózi – kitap bolsa, ony nasıhattaıtyn rýhanı orta – kitaphana. Kitaphanashy – sol asyl murany kóziniń qarashyǵyndaı saqtap, oqyrmandy rýhanı álemge jeteleıtin tulǵa», deı otyryp, áriptesterin kásibı merekelerimen quttyqtady.
Alǵashqy «О́zi týraly beınebaıan» atty kezeńde baıqaý qatysýshylary beınerolıkteri arqyly ózderiniń osy kásipke kelý maqsatyn, qyzmeti men jetistikterin kórsetti. «Shyǵarmashylyq álemim» kezeńinde óz ónerlerin ortaǵa salyp, Aıgúl Isaqanova toqyma buıymdaryn, Aıaýlym Taǵaıbek tátti toqashtaryn, Talshyn Ashatqyzy qoldan jasalǵan sómkelerin ortaǵa alyp shyǵyp, jasalý joldary men sheberlik syrymen bólisti.
Qazylar alqasynyń sheshimimen «Oqyrmandarǵa qyzmet kórsetý» bóliminiń bas mamany Aıgúl Álıqyzy «Úzdik kitaphanashy – 2025» baıqaýynyń bas júldegeri atanyp, arnaıy dıplommen marapattaldy. Baıqaý demeýshileriniń atynan jeńimpazǵa 100 000 teńge, qalǵan qatysýshylarǵa 50 000 teńgeden qarjylaı syılyq berildi.