Bıyl elimizde 8,5 myń birlik aýyl sharýashylyǵy tehnıkasyn jeńildetilgen qarjy lızıngi arqyly alýǵa sharttar jasaldy, dep habarlaıdy Egemen.kz.
Mınıstr Aıdarbek Saparovtyń aıtýynsha, aýyl sharýashylyǵy tehnıkasyn jeńildetilgen lızıng baǵdarlamasy boıynsha qarjylandyrý kólemi 250 mlrd teńgeni qurap otyr. Búginde 8,5 myń birlik aýyl sharýashylyǵy tehnıkasyn jetkizýge 216,3 mlrd teńge somasyna qarjy lızıngi sharttary jasalǵan.
Aýyl sharýashylyǵy tehnıkasynyń negizgi bóligi traktorlar men kombaındar, bul jalpy sannyń 54%-yn quraıdy.
Bıyl Qazaqstanda zamanaýı jáne joǵary ónimdi tehnıka óndiretin álemdik John Deere brendi lokalızasııalanǵannan keıin jeńildikti lızıngtiń jeke baǵdarlamasy iske qosylǵan. Osy baǵdarlama sheńberinde barlyǵy 23 mlrd teńge somasyna 109 tehnıka lızıngke qarjylandyryldy, 2,2 mlrd teńgege taǵy 13 tehnıka satyp alý mámilesi maquldandy.
Aıdarbek Saparov bul baǵdarlamanyń agrosektordaǵy eńbek ónimdiligin arttyrýǵa jáne tehnıkalyq parkti jańartýǵa tikeleı yqpal etetinin atap ótti.