Májilistiń jalpy otyrysynda depýtat Erlan Saırov Qarjy naryǵyn retteý jáne damytý agenttigine (QNRDA) bankterge klıentterdiń aǵymdaǵy shottaryndaǵy qarajatqa paıyzdyq syıaqy esepteýge ruqsat berýdi usyndy. Onyń aıtýynsha, klıentterdiń aǵymdaǵy shottaryna paıyz esepteýge salynǵan tyıymdy alyp tastaǵan abzal, dep jazady Egemen.kz.
Depýtattyń pikirinshe, qoldanystaǵy zańda halyqaralyq standarttarǵa sáıkes kelmeıtin ári ádilet ustanymdaryna qaıshy keletin normalar bar. E.Saırov 2020-2024 jyldar aralyǵynda ekinshi deńgeıli bankterdiń tabysy 8,2 trıllıon teńgege, al bıylǵy jyldyń 9 aıynda ǵana 2 trıllıon teńgege jetkenin aıtty.
Erlan Saırovtyń sózinshe, bankterdiń shamadan tys paıda tabýy 2019 jyly Ulttyq bank engizgen normalarmen baılanysty. Qazir bankter azamattardyń tólem kartalaryndaǵy jáne kvazımemlekettik sektor shottaryndaǵy qaldyqtarǵa óte tómen paıyz tóleıdi. Basqasha aıtqanda, bankter bul qarajat úshin halyqqa syıaqy tólemeıdi, biraq olardy paıdalanýdy jalǵastyra beredi, al Ulttyq bank óz paıyzyn alady.
«Mundaı tájirıbe álemniń eshbir elinde joq, tek Qazaqstanda ǵana bar. Sondyqtan depýtattar osy ádiletsiz normany joıý úshin túzetýler engizýdi usyndy», dedi Májilis depýtaty.
Jaýap retinde Mádına Ábilqasymova agenttiktiń jalpy alǵanda bul usynysty qoldaıtynyn aıtty. Onyń túsindirýinshe, aǵymdaǵy shottarǵa syıaqy esepteýge tyıym 2018 jyly kvazımemlekettik kompanııalardyń tıimsiz tájirıbesine jáne bankterde turaqty qarjylandyrý bazasyn qalyptastyrý qajettiligine baılanysty engizilgen.
«Bul óte mańyzdy, sebebi ekonomıka uzaqmerzimdi nesıeler alýy úshin senimdi jáne berik qorlandyrý bazasy qajet. Al aǵymdaǵy shottardaǵy qarajatty klıent kez kelgen ýaqytta sheship ala alady, sondyqtan olarǵa paıyz tóleýge tyıym salynǵan», dedi M.Ábilqasymova.
Mádına Ábilqasymovanyń aıtýynsha, eger tyıym alynyp tastalsa da, aǵymdaǵy shottar boıynsha mólsherlemeler tómen kúıinde qalady. Halyqaralyq tájirıbege sáıkes, mundaı shottardaǵy paıyzdar depozıtterge qaraǵanda edáýir az bolady, óıtkeni qarajatty kez kelgen sátte sheship alýǵa bolady.
QNRDA tóraıymy depýtattardyń usynysyn qoldaıtynyn rastady, biraq aǵymdaǵy shottar boıynsha syıaqy az mólsherde ǵana tólenetinin atap ótti.