Jasandy ıntellekt jáne sıfrlyq damý mınıstrligi aldaǵy bes jylda 1 mıllıon adamdy IT jáne jasandy ıntellekt (JI) daǵdylaryna oqytýdy josparlap otyr, dep habarlaıdy Egemen.kz vedomstvonyń baspasóz qyzmetine silteme jasap.
Mınıstrlik sıfrlyq sala mamandaryn kásibı merekeleri – Sıfrlandyrý kúnimen quttyqtap, osy baǵyttaǵy qysqasha nátıjelerin jarııalady.
Mınıstrlik málimetine sáıkes, qazir Qazaqstandaǵy IT salasynda 200 myńnan astam adam jumys isteıdi, olardyń shamamen 20 myńy JI salasynyń mamandary. Kelesi bes jylda mınıstrlik 1 mıllıon adamdy IT jáne JI salasyna úıretýdi kózdep otyr.
«Qazirgi tańda biz Tech Orda bilim berý baǵdarlamasyn iske asyrýdamyz. Bul baǵdarlama aıasynda 9 037 maman IT daǵdylaryna daıyndaldy. Oqytý baǵdarlamalary onlaın jáne oflaın formatta júrgiziledi, keń aýdıtorııaǵa jáne tájirıbeli mamandarǵa arnalǵan (Tomorrow School, AI’Preneurs, AI-People Bootcamp, AI Quest 1.0). Qazirgi ýaqytta 12–18 jas aralyǵyndaǵy jasóspirimderge arnalǵan TUMO shyǵarmashylyq tehnologııalar ortalyǵynda oqýǵa irikteý júrgizilip jatyr. Balalar anımasııa, baǵdarlamalaý, 3D-grafıka jáne generatıvti JI salalarynda tegin oqı alady. Stýdentter men jastar úshin Tomorrow School – Qazaqstandaǵy alǵashqy JI mektebi jumys isteıdi. Memlekettik qyzmetshilerge arnalǵan AI Qyzmet baǵdarlamasy iske qosyldy, ol JI-dy etıkalyq jáne tıimdi túrde memlekettik basqarýǵa engizýge baǵyttalǵan. Qazirgi ýaqytta baǵdarlama boıynsha shamamen 50 myń memlekettik qyzmetshi oqytyldy. QazCoders baǵdarlamasy, BAÁ-pen seriktestik negizinde, baǵdarlamalaý jáne JI boıynsha kýrstardy jasqa qaramastan usynady. Sonymen qatar MIT-pen seriktestik aıasynda mektep baǵdarlamasyna JI engizý bastaldy, bastapqyda 1-4 synyptarda, keıingi jyldary 12 synypqa deıin keńeıtiledi», delingen habarlamada.
Mınıstrlik atap ótkendeı, 2025 jyl Qazaqstan úshin sıfrlandyrý jáne jasandy ıntellekt salasynda mańyzdy jyl boldy. Sol jyly Alem.Cloud ulttyq sýperkompıýter klasteri qurylyp, ekzaskeıl esepteýler men ulttyq JI modelderin qoldaýdy qamtamasyz etti. Qazaqstan NVIDIA jáne Freedom Holding Corp sııaqty álemdik iri kompanııalarmen Sýverendi AI Hub qurý týraly kelisimge qol qoıdy. Bul kelisim eldiń esepteý qýatyn qamtamasyz etip, ony JI aımaqtyq ortalyǵy retinde nyǵaıtady.
Sonymen qatar, International AI Center alem.ai ashyldy. Bul – zertteý zerthanalary, AI Academy, TUMO School jáne Tomorrow School ortalyqtaryn biriktiretin ekojúıe. Bul jerde jas ınjenerler, zertteýshiler jáne kásipkerler oqyp, jumys isteıdi. 2025 jyly Amazon Kuiper spýtnıktik ınterneti iske qosyldy, sondaı-aq Qazaqstan naryǵyna Starkink jáne One-Web spýtnıktik ınterneti endi. Bul jobalar shalǵaı aýyl mektepteri men turǵyndarǵa joǵary jyldamdyqty ınternet qamtamasyz etedi. Generation Nation bastamasy júzdegen myń mektep oqýshylary men stýdentterdi JI, robototehnıka jáne baǵdarlamalaý salalaryn oqytýǵa tartty. Sonymen qatar, Qazaqstan Cisco, Groq jáne Joby Aviation kompanııalarynyń pılottyq jobalaryna aımaqtyq alań retinde tańdaldy.
Eske salsaq, Astana Hub osyǵan deıin 7 jyldyǵyn atap ótti. Bul ýaqyt ishinde klaster Qazaqstan men Ortalyq Azııadaǵy IT ındýstrııasyn damytý ortalyǵyna aınaldy. Qatysýshylar sany 1 875-ke jetip, olardyń 470-i sheteldik qatysýmen jumys isteıdi. Qatysýshylarǵa salyqtyq jeńildikter, jeńildetilgen eńbek jáne vıza rejımderi, ınfraqurylym jáne halyqaralyq yntymaqtastyq múmkindikteri beriledi. 2019 jyldan beri qatysýshylardyń jalpy tabysy 4,3 mlrd dollar, al 2025 jyly IT qyzmet kórsetý eksporty 1,5 mlrd dollardan astam bolady. 7 jyl ishinde Astana Hub startaptary 840 mln dollardan astam ınvestısııa tartqan.
«Búgingi tańda memlekettik qyzmetterdiń 90%-dan astamy onlaın formatta kórsetiledi. eGov, Smart Data Ukimet, Digital ID jáne Alem.AI platformalary myńdaǵan mamandarǵa qoldaý kórsetip, ár qyzmetti yńǵaıly, qoljetimdi jáne qaýipsiz etedi. Mınıstrlik sıfrlyq servısterdi qoldaǵan barsha mamandarǵa alǵys aıtady», dep qorytyndylady vedomstvo.