Jetisý oblysynda úsh balanyń anasy, 25 jyldan beri úı jaǵdaıynda sút ónimderin óńdeýmen aınalysatyn jas kásipker saýmaldan balmuzdaq óndire bastady. Ol óz taýaryn «Bir aýyl – bir ónim» kórmesinde tanystyrǵan, endi kásipkerlikti qoldaýǵa baǵyttalǵan memlekettik baǵdarlamalardyń birine qatysý arqyly óndiris prosesin avtomattandyrýdy josparlap otyr, dep habarlaıdy Egemen.kz oblystyń baspasóz qyzmetine silteme jasap.
Sarqan aýdany Sarqan qalasynyń turǵyny Raıgúl Zakarııaqyzyna úı jaǵdaıynda balmuzdaq óndirý týraly oıdy alǵash kenje uly aıtqan eken. Bıe sútiniń emdik qasıetterin eskere otyryp, ol balmuzdaq jasaýǵa saýmaldy paıdalanǵandy jón kórgen. Sóıtip balmuzdaqtyń quramyna úıdiń qaımaǵy men bal qosyp, óz reseptin jasap shyqty. Otbasy músheleri onyń dámin joǵary baǵalap, Raıgúldi ónimin odan ári jetildirýge yntalandyrdy.
«Otbasynda úsh ul tárbıelep otyrmyz. Turmysqa shyqqan soń jubaıym ekeýmiz mal sharýashylyǵymen aınalystyq. Bul salanyń qyr-syryn meńgerip, jumys istep júrgenime shamamen 25 jyl boldy. Árıne, eńbegi aýyr. Jaz aılarynda tańǵy saǵat 3 jarymnan, qysta 5-ten turamyz. Sıyr, bıe ustaımyz. Joldasym mal kútimimen, al men sútten taǵam jasaý jumystarymen aınalysamyn. Qurt, maı, qymyz jáne basqa da ónimder daıyndaımyn. Olardy jergilikti turǵyndar jaqsy alady. Al jaz mezgilinde tipti Almaty, Astana, Atyraý qalalarynan da kelip, emdik saýmal ishetinder bar. Al keıingi kezde kenje balam balmuzdaqty qatty jaqsy kóretindikten, men balmuzdaqty úı jaǵdaıynda jasap kórýge bel býdym», deıdi Raıgúl Zakarııaqyzy.
Sóıtip osy talpynysynyń nátıjesinde jasandy qospa men boıaýsyz, ulttyq tamaqtaný erekshelikterin eskere otyryp daıyndalǵan paıdaly ári dámdi balmuzdaq alyndy.
«Ejelden ata-babalarymyz bıe sútiniń joǵary emdik qasıetin jaqsy bilgen. Sondyqtan ony balalar taǵamynda paıdalaný oryndy dep esepteımin. Alaıda saýmaldan balmuzdaqty qoldan daıyndaýǵa óte uzaq ýaqyt ketedi eken. Ár jarty saǵat saıyn ıngredıentterdi jaqsylap aralastyryp, sosyn salqyndatyp qoıyp, tolyq qoıýlanǵansha qaıta-qaıta aralastyryp otyrý kerek, sodan keıin ǵana 4 saǵatqa tońazytqyshqa qoıamyz. Sol sebepti ázirge balmuzdaqty tek otbasym úshin ǵana jasap júrmin. Al óndiristi keńeıtý úshin maǵan arnaıy jabdyq kerek, sondyqtan men bızneske qoldaý kórsetetin memlekettik baǵdarlamalardyń birine qatyssam dep otyrmyn. Oǵan qosa «Bir aýyl – bir ónim» jobasynyń jartylaı fınalısi atandym. Kelesi jyldan bastap osy joba aıasynda meniń jańa ónimimdi damytýǵa qoldaý kórsetiledi», dedi jas kásipker.
Jetisý oblysynyń Áıelder kásipkerligin damytý ortalyǵynyń málimetine qaraǵanda, bul joba ony iske asyrýdyń barlyq kezeńderinde tolyq súıemeldenedi. Oǵan marketıng negizderi, qarjylyq saýattylyq jáne jalpy kásip júrgizý qaǵıdattary boıynsha oqytý da kiredi.
«Raıgúl Zakarııaqyzynyń ónimi joǵary sapaly. Qańtar aıynan bastap biz onyń ónimin sertıfıkattaý jumysyn bastaımyz. Keıin qaptamasyn ázirleýmen qatar, kásipkerdiń bilimin arttyrý baǵytynda da birlese jumys isteıtin bolamyz. Bizdiń basty maqsatymyz – úı jaǵdaıynda jasalatyn óndiristi naryqqa shyǵarý. Mysaly, «Bir aýyl – bir ónim» jobasynyń fınalısteri de bastapqyda Raıgúl sekildi óz isin shaǵyn kólemde bastaǵan. Qazir olar óz ónimderiniń túrlerin kóbeıtip, jergilikti dúkenderge, sondaı-aq Almaty qalasyna da shyǵaryp otyr. Biz olarǵa jeke brend qalyptastyrýǵa kómektestik dep aıta alamyz. Mysaly, Kóksý aýdanynda bal jáne basqa da ara sharýashylyǵy ónimderin daıyndaıtyn kásipker áıel, sol sııaqty ájelerimizdiń kóne resepti boıynsha ashytqysyz nan pisiretin aqsýlyq turǵyn, osyndaı tabysty mysaldar kóp. Bizdiń oblys turǵyndary eńbekqor, únemi damýǵa umtylady. Al bizdiń maqsatymyz – olardyń ıdeıalaryn naqty, turaqty tabys ákeletin bızneske aınaldyrýǵa qoldaý kórsetý», dedi oblystyq Áıelder kásipkerligin damytý ortalyǵynyń mentory Svetlana Ońǵarbaeva.
Atap ótsek, bıylǵy jyldyń 1 qazanyndaǵy málimet boıynsha, Jetisý oblysynda 62 740-tan astam belsendi shaǵyn jáne orta bıznes sýbektisi tirkelgen, bul ótken jyldyń sáıkes kezeńimen salystyrǵanda 4,3%-ǵa kóp.
Sonymen qatar «Bir aýyl – bir ónim» jobasy iske asyryla bastalǵaly beri 9 fınalıst memlekettik grant ıegeri atanyp, jalpy somasy 45 mıllıon teńge kóleminde qoldaý alǵan. Jalpy bıylǵy jyly óńirde shaǵyn jáne orta bıznesti qoldaý baǵdarlamalary aıasynda sýbsıdııalar, kepildikter jáne granttar berý arqyly túrli 111 joba qarjylandyrylǵan.