2026 jyldan bastap kúshine enetin salyq reformasy Taxi Forum Kazakhstan 2025 plenarlyq alańynda talqylandy. Endi jańa erejeler taksı tarıfterin birneshe ese ósirmeıdi, alaıda ınflıasııa men salyq talaptarynyń ózgerýi jol júrý qunynyń birshama qymbattaýyna yqpal etýi múmkin. «Atameken» UKP forýmda bıznes úshin ońtaıly sheshim tabýdyń mańyzyn aıtty, dep jazady Egemen.kz.
Forýmda jańa Salyq kodeksiniń bızneske beretin múmkindikteri erekshe atap ótildi. Ońaılatylǵan deklarasııa rejıminde tyıym salynatyn qyzmet túrleri 795-ten 44-ke deıin qysqaryp, taksı sekildi shaǵyn kásip ıelerine jeńildetilgen tártipte jumysyn jalǵastyrýǵa jol ashyldy. 2026 jyldan bastap engiziletin servıstik model men avtomattandyrylǵan baqylaý ákimshilik qysymdy azaıtady.
«Jańa Salyq kodeksi eń aldymen bızneske qolaıly bolýy tıis. Bul el ekonomıkasynyń bolashaǵyna oń áser etedi», deıdi «Atameken» UKP Basqarma tóraǵasynyń orynbasary Tımýr Jarkenov.
Onyń aıtýynsha, Palata shaǵyn jáne orta bıznes úshin turaqty ári túsinikti orta qalyptastyrý baǵytyndaǵy jumysyn jalǵastyra beredi.
Qazir kásipkerler arasynda eń jıi aıtylyp otyrǵan másele – jalpyǵa birdeı belgilengen rejım men arnaıy rejımdi qatar qoldanǵan kezde shegerimderge tyıym salynýy. Kóptegen kásipker bul normanyń saldaryn endi túsine bastaǵan.
«Bul shaǵyn bıznes úshin óte mańyzdy suraq. Biz barlyq ótinishti jınap, salanyń erekshelikterin eskerip, Úkimetke kezdesý ótkizý týraly usynys joldadyq», dedi Jarkenov.
Sondaı-aq forýmda ózin-ózi jumyspen qamtyǵan taksı júrgizýshilerine qatysty jańa talaptar da talqylandy. Jańa norma boıynsha, arnaıy salyq rejımi men ońaılatylǵan deklarasııany qatar qoldanýǵa tyıym salynady. Máselen, arnaıy rejımde shaǵyn dúken ustaıtyn kásipker keshkisin taksı aıdaıtyn bolsa, eki rejımde qatar bola almaıdy. Ol ne tolyqtaı ózin-ózi jumyspen qamtyǵandarǵa arnalǵan rejımge, ne ońaılatylǵan deklarasııaǵa ótýi qajet.
«Senat talqylaýy kezinde Úkimettiń ustanymy ózgerdi. Sonyń saldarynan saýdamen de, taksımen de aınalysatyn azamattar tolyq salyq tóleýge májbúr bolady. Bul Iаndeks sııaqty platformalardyń modeline de yqpal etedi», dedi sarapshy.
Onyń pikirinshe, bul talap jeke tulǵalar úshin túsiniksiz mehanızm qalyptastyryp, kóleńkeli ekonomıka qaýpin kúsheıtýi múmkin.
Taksı tarıfteriniń kelesi jyly qalaı ózgeretini de sóz boldy. Sarapshylar baǵa eldegi ınflıasııa deńgeıine sáıkes ósetinin, biraq birneshe ese kúrt qymbattaý bolmaıtynyn aıtty. Taksoparkter qaýymdastyǵynyń tóraǵasy Meıram Abelkasov tarıftiń negizgi shyǵyndar men naryqtaǵy suranys-usynys zańyna qaraı qalyptasatynyn jetkizdi. Al Iаndeks Taksı ókilderi naqty áserdi jańa normalar kúshine engen soń ǵana baǵalaýǵa bolatynyn atap ótti. Maýsymdyq faktor da mańyzdy – jazda júrgizýshilerdiń bir bóligi basqa salaǵa aýysatyndyqtan, usynys azaıyp, baǵa ósedi.
Forýmda ekologııalyq kólikke kóshý úrdisi de nazardan tys qalmady. Iаndeks Taksı sarapshysy Alına Nııazovanyń aıtýynsha, elektrli kólik júrgizýshileri «Elektro» tarıfinde qazirdiń ózinde «Komfort+» sanatyndaǵy áriptesterine qaraǵanda joǵary tabys taýyp jatyr.