Jetisý oblysynda sý tasqynynyń aldyn alýǵa baǵyttalǵan ınjenerlik jumystar júıeli túrde júrgizilýde. Oblys ákiminiń baspasóz qyzmetiniń habarlaýynsha, jyl basynan beri 2 km qorǵanys dambylary salynyp, jóndelgen. Sonymen qatar 5,8 km sý burý arnalary men aryqtar ornatylyp, 2,7 km ózen jáne kanal arnalary mehanıkalyq tazartýdan ótti. О́zenderdiń 4 shaqyrymynda tereńdetý, arnalardy túzeý jáne jaǵalaýdy bekitý jumystary oryndalǵan, dep jazady Egemen.kz.
Taldyqorǵan qalasynda Qaratal ózeniniń arnasyn mehanıkalyq tazartý men nyǵaıtý jumystary aıaqtalýǵa jaqyn. Panfılov aýdanynyń Súptaı aýylynda Tyshqan ózeniniń arnasy nyǵaıtylyp jatyr. Sý tasqynynyń aldyn alýǵa baǵyttalǵan 16 is-sharanyń 8-i qazir aıaqtalǵan.
Atqarylǵan jumystardyń qatarynda Sarqanda Lepsi, Kóksýda Byjy jáne Jarlyózek ózenderiniń 830 metrlik bóliginde arna túzetý bar. Muqanshy men Musabek aýyldarynda 2,7 km sý burý kanaldary tereńdetilip, Kerbulaq aýdanynyń Saryózek aýylynda 500 metrlik aryq jańartyldy. Qaratal aýdany Kókdala jáne Aqsý aýdany Qapal aýyldarynda 2,5 km-ge jýyq kanaldar tereńdetildi. Taǵy segiz nysanda jumystar jalǵasyp jatyr.
Jospardan tys is-sharalar da atqarylýda. Kerbulaq aýdany Shubar aýylynda Keskenterek ózeniniń arnasy tereńdetilip, túzetildi. Taldyqorǵanda Balyqty, Qaratal aýdany Tastóbe aýylynda Qaratal ózenderiniń jaǵalaýlaryn nyǵaıtý jumystary júrip jatyr.
Jalpy, sý tasqynynyń aldyn alý aıasynda 48 km kanal, 71 km aryq jáne 1489 sý ótkizý qurylǵysy sanıtarlyq tazartýdan ótti.
Jetisý oblysy TJD ókili Rınat Tazabekovtiń aıtýynsha, bul jumystar óńirdiń qaýipsizdigin arttyrýda mańyzdy ról atqarady jáne aldaǵy ýaqytta da jalǵasyn tabady.