Abaı oblysynda Aýyl sharýashylyǵy jáne qaıta óńdeý ónerkásibi qyzmetkerleri kúni atalyp ótti. Bıyl alǵash ret agrarlyq saladaǵy úzdik mamandarǵa 10 avtokóliktiń kilti tabystaldy, dep habarlaıdy Egemen.kz.
Semeıde ótken «Altyn kúz» atty saltanatty sharada jyl qorytyndysy shyǵarylyp, óńirdiń úzdik eńbekkerleri marapattaldy. Oblystyń aýyl sharýashylyǵy jalpy óniminiń kólemi 404 mlrd teńgeden asty. Mal sharýashylyǵy men qaıta óńdeý salasynda ósim baıqalady, jańa kásiporyndar ashylýda. Bıyl aýyl sharýashylyǵy qurylymdary 446 jańa tehnıka satyp alǵan.
Abaı oblysynyń ákimi Berik Ýálı óńir agrarshylarynyń eńbegin joǵary baǵalady.
«Bul jyly aýqymdy jumys atqaryldy, aýyl sharýashylyǵy men mal sharýashylyǵy salasynda bolashaqqa josparlar belgilendi. Barlyq jetistikter – sizderdiń eńbekterińizdiń, tabandylyqtaryńyz ben jankeshtilikterińizdiń nátıjesi. О́ńirdiń damýyna qosqan úlesterińiz óte qymbat», – dedi ol.
Bıyl óńirde alǵash ret agrosferanyń úzdik mamandaryna avtokólikter tabystaldy. Jeńimpazdar «Úzdik shopan», «Úzdik mehanızator», «Úzdik tehnolog», «Úzdik traktorshy» nomınasııalary boıynsha anyqtaldy.
Sonymen qatar «Qurmet» ordeni, «Dańq» ordeniniń III dárejesi, «Eńbek úzdigi», «Eńbek ardageri» medaldary tapsyryldy.
«Úzdik shopan» atanǵan Erjan Melsov aýyl sharýashylyǵyna nazardy kúsheıtý qajet ekenin aıtty.
«Qazir ásirese jastar arasynda qoı baǵýmen aınalysatyndar az. Aýyl – eldiń túp qazyǵy deıdi. Aýyldardyń damýy – memlekettiń órkendeýi. Sondyqtan aýylǵa jáne aýyl sharýashylyǵyna kóbirek kóńil bólý kerek», – dedi ol.
Fermer Muhamethan Asanbekov eńbeginiń joǵary baǵalanǵanyna rızashylyǵyn bildirdi.
«Eńbegimniń osylaı qurmettelgenine qýanyshtymyn. Bul shabyt beredi, alǵa jeteleıdi. Barshańyzǵa raqmet, ómirimizde mundaı qýanyshty sátter kóp bolsyn», – dedi ol.
Shara barysynda aýyl eńbekkerleriniń kásibı jetistikteri ǵana emes, óńirdegi agrarlyq salanyń damý baǵyttary da atap ótildi.