Ertis-Baıan óńiriniń aqparat minberine aınalǵan oblystyq «Ertis» telearnasyna 60 jyl toldy. Aımaqtyń basty arnasy osy ýaqyt ishinde halyqtyń muńyn muńdap, joǵyn joqtaýshy, qoǵam ómiriniń aınasy bola bildi.
El-jurt basynan ótkergen qıyn-qystaý kúnderdiń, qýanyshty únderdiń kýásine, jaqsylyqtyń jarshysy, ıgi isterdiń bastaýshysyna aınalǵan «Ertis» arnasynyń mereıtoıy oblys kóleminde atalyp ótti.
Alpys jyl ishinde aımaqtyń basty arnasy talaı tarıhı kezeńdi bastan keshti. Ekrandaǵy beıneler aq-qara tústen zaman talabyna saı túrli tústi beınege aýysyp, telestýdııalar jańardy. О́ńirdiń kez kelgen núktesinen tikeleı efırde aqparat taratý múmkindigine qol jetkizdi. Qazirgi ýaqytta arna zamanǵa saı jobalar usynyp, kórermen kóńilinen shyǵatyn kontentterdi úzbeı berip keledi. Bul qatarda «OILike», «Jańa kún», «Birinshi stýdııa», «Teleortalyq», «Rýhanııat», «Amanat», «Sarasóz» ben taǵy basqa telebaǵdarlamalardy atap ótýge bolady. Bıyl sıfrlyq tehnologııalar keń qoldanys taýyp, vırtýaldy júrgizýshi de paıda boldy. Zaman kóshinen qalyspaǵan arna ujymynyń deni – jastar.
«Ondaǵan jyldar boıy «Ertis» óńirimizdiń úni bolyp keledi jáne solaı bolyp qala beretinine senim berik. Sizder taratatyn aqparatqa halyq senedi ári obektıvti aqparat kútedi. Ujym bul mindetti abyroımen atqaryp júr» dep atap ótti óńir basshysy Asaıyn Baıhanov.
Oblys ákimi arnanyń avtokólik parkin jańartýǵa 30 mln teńgelik sertıfıkat tabys etti.
PAVLODAR