Qazaqstan Ulttyq bankiniń derekteri boıynsha, 2025 jyldyń maýsym aıynyń sońynda eldiń syrtqy qaryzy 172,8 mlrd dollardy qurap, jyldyq mánde 3,6%-ǵa artty, dep habarlaıdy Egemen.kz.
Syrtqy qaryzdyń JIО́-ge qatynasy 56,6%-dan 59,2%-ǵa deıin ósti. Bul ekonomıkanyń ósý qarqynyna qaraǵanda qaryz alýdyń jyldamyraq ulǵaıýymen baılanysty.
Qaryz qurylymynyń basty ereksheligi – onyń shıkizat sektorlaryna baılanýy. Syrtqy mindettemelerdiń eleýli bóligin fırmaaralyq qaryzdar quraıdy, olardyń úlesi jalpy syrtqy qaryzdyń 53,6%-y. Iаǵnı bul sheteldik negizgi kompanııalardyń qazaqstandaǵy enshiles uıymdaryna beretin qaryzdary.
Salalyq taldaý boıynsha fırmaaralyq qaryzdardyń 79%-y (72,8 mlrd dollar) shıki munaı men tabıǵı gaz óndirýge tıesili. Jalpy alǵanda, taý-ken óndirý ónerkásibi syrtqy qaryzdyń 45,8%-yn quraıdy, onyń shamamen 42,5%-y munaı men gazǵa tıesili. Mundaı qurylym Qazaqstan ekonomıkasynyń áli de shıkizattyq sıpatta ekendigin dáleldeıdi.
2025 jyldyń maýsym aıynyń sońynda Ulttyq qordyń aktıvteri 60,3 mlrd dollardy, al jıyntyq halyqaralyq rezervter 51,8 mlrd dollardy qurady. Barlyǵy shamamen 112 mlrd dollar nemese JIО́-niń 38%-y. Rezervter, negizinen, memlekettik jáne kvazımemlekettik sektordyń qaryzyn tolyq jabýǵa jetkilikti.
Rezervterdiń joǵary bolýyna qaramastan, memlekettik jáne kvazımemlekettik qaryzdyń ári qaraı ósýi eldiń shartty qaryzdyq júktemesin arttyryp, uzaq merzimdi perspektıvada bıýdjetterdiń fıskaldyq múmkindikterin shekteýi múmkin.