Qarjylyq monıtorıng agenttiginiń Astana qalasy boıynsha departamenti «Qyran» turǵyn úı kesheninen aqsha qarajatyn jymqyrý shemasyn uıymdastyrǵan qurylys kompanııasynyń qyzmetkerlerin tekserip jatyr. Alaıaqtyq nátıjesinde azamattar men kompanııaǵa jalpy 7,9 mlrd teńge shyǵyn keltirilgen, dep habarlaıdy Egemen.kz.
Tergeý derekterine sáıkes, satý keńsesinde satyp alýshylarǵa kompanııanyń jyljymaıtyn múlik nysandaryna menshik quqyǵy baryn dáleldeıtin maketter, tehnıkalyq pasporttar, senimhattar men anyqtamalar kórsetilgen. Azamattarǵa páterler, kommersııalyq úı-jaılar men parkıng oryndary naryqtyq baǵadan tómen usynylǵan jáne mámilelerdiń zańdy ekeni aıtylǵan.
Alaıda, satyp alý-satý sharttarynyń ornyna kúdiktiler brondaý sharttary, kepil týraly kelisimder men aldyn ala sharttardy rásimdegen. Bul qujattar memlekettik tirkeýge jatpaıdy jáne menshik quqyǵyn bermeıdi. Jábirlenýshiler tólemderdi qolma-qol jáne jeke shottar arqyly jibergen, al býhgalterlik jáne banktik qujattarda bul operasııalar kórsetilmegen. Nátıjesinde azamattardan 3,8 mlrd teńge jymqyrylǵan.
Sondaı-aq, kúdiktiler qurylys kompanııasynyń qarajatyn urlaýǵa baǵyttalǵan ekinshi alaıaqtyq shemany da iske asyrǵan. Klıenttermen jalǵan satyp alý-satý sharttary jasalyp, obektilerge menshik quqyqtary tirkelgen, alaıda satýdan túsken 4,1 mlrd teńge kompanııanyń kassasyna túspegen.
«Osylaısha azamattarǵa jáne kompanııaǵa keltirilgen jalpy zalal 7,9 mlrd teńgeni qurady. Sot sanksııasymen 94 páterge, 51 parkıng ornyna, 8 kommersııalyq úı-jaıǵa jáne bir avtokólikke tyıym salyndy. Úsh kúdiktige qatysty qamaýǵa alý túrindegi bultartpaý sharasy qoldanyldy», delingen habarlamada.