Bıznestiń áleýmettik jaýapkershiligi aıasynda salynǵan ınklıýzıvti sport kesheniniń ashylýyna Freedom Holding Corp kompanııasy qoldaý kórsetken. Jańa ǵımarattyń ashylý saltanatyna Batys Qazaqstan oblysynyń ákimi Narıman Tóreǵalıev pen Freedom Holding Corp kompanııasynyń basshysy Tımýr Týrlov qatysty, dep habarlaıdy Egemen.kz.
Oraldaǵy jańa ǵımarattyń jalpy aýmaǵy – 2 025 sharshy metr. Keshen paraolımpııalyq jáne sýrdolımpııalyq sport túrlerimen aınalysýǵa tolyqtaı beıimdelgen. Munda voleıbol, basketbol, golbol, paýerlıftıng, bochcha, badmınton, sadaq atý, dzıýdo, grek-rım kúresi, erkin kúres, ústel tennısi sekildi sport túrleri boıynsha jattyǵý jasaýǵa múmkindik bar. Qurylysyna shamamen 820 mln teńge qarajat ketken keshenniń jalpy syıymdylyǵy – 200 adam.
-Memleket basshysy Qasym-Jomart Kemeluly Toqaev óz sózinde: «Kásipkerlerdiń áleýmettik jaýapkershiligi de, jergilikti qaýymdastyqtarmen uzaq merzimge arnalǵan seriktestik qatynas ornatýǵa degen qulshynysy da zor. Bul – qýanarlyq jaǵdaı. Memleket pen bıznestiń yqpaldastyǵy arqyly kóptegen áleýmettik másele sheshimin taýyp jatyr», dep atap ótken edi. Bizdiń búgingi jańa sport nysanynyń ashylýy da Prezıdent sóziniń jarqyn kórinisi, aıqyn dáleliniń biri der edim. Bul nysan – ınklıýzıvti qoǵam qurýǵa baǵyttalǵan naqty qadam, memleketimizdiń áleýmettik jaýapkershiliginiń jemisi, - dedi Narıman Tóreǵalıev áleýmettik bastamanyń mańyzdylyǵyna toqtalyp.
О́ńir basshysynyń aıtýynsha, sońǵy eki jylda oblysta 12 sport nysany paıdalanýǵa berilgen, al bıyl taǵy 9 nysannyń qurylysy júrip jatyr. Sonyń beseýi jyl sońyna deıin el ıgiligine tapsyrylmaq.
«Bul nysan – bizdiń elge degen janashyrlyǵymyzdyń belgisi. Keshen múmkindigi shekteýli jandardyń ómirge degen qulshynysyn arttyryp, jańa belesterge jetýine dem beredi dep senemiz», dedi osy jıynǵa arnaıy kelgen Tımýr Týrlov.
Jańa keshenniń bazasynda «Múmkindigi shekteýli jandarǵa arnalǵan sport klýby» jumys isteıdi. Búginde atalǵan klýbta sporttyń 20 túrinen 250-ge jýyq sportshy jattyǵyp júr eken. «Olardyń 74-i ulttyq quramanyń qatarynda» deıdi klýb basshysy Qaıyrbek Ońdaǵanov.
2016 jyly ashylǵan bul klýb osy kezge deıin turǵyn úıdiń astyńǵy qabatynda jumys istep kelgen edi. Endi keń ári qolaıly jeke ǵımarat berilgen soń óńirde paralımpıadalyq jáne sýrdolımpıadalyq sporttyń damýyna úlken serpin bolaryna senemiz deıdi sportshylar.