Bıylǵy 11 aıda múgedektik tobyn belgileýde medısınalyq-áleýmettik saraptama júrgizýdiń syrttaı formaty jaqsy nátıje berdi. Qanatqaqty jobany iske asyrý sheńberinde óńirlerden 99,6 myń ótinim qaraldy.
Búginde syrttaı formatta kýálandyrý 50-den astam nozologııalyq nysan negizinde júzege asyrylady. Byltyr 96,9 myńnan astam ótinim syrttaı formatta qaraldy. Bul – kýálandyrýdan ótken múgedektigi bar adamdardyń jalpy sanynyń 37,4%-y.
Ulttyq qoǵamdyq senim keńesiniń VI otyrysynda Memleket basshysy Qasym-Jomart Toqaev erekshe qajettilikteri bar adamdarǵa barynsha qolaıly jaǵdaı jasaýdy, olardy ınstansııalar men qaǵazbastylyqtan aryltyp, kórsetiletin qyzmetti berýshilerdiń qyzmet alýshylarmen baılanysyn boldyrmaýdy tapsyrdy. Prezıdent júktegen mindetti oryndaý maqsatynda Eńbek jáne halyqty áleýmettik qorǵaý mınıstrligi Densaýlyq saqtaý men Sıfrlyq damý, ınnovasııalar jáne aeroǵarysh ónerkásibi mınıstrlikterimen birlesip elimizdiń barlyq 20 óńirinde qanatqaqty joba – medısınalyq-áleýmettik saraptama (MÁS) júrgizýdiń syrttaı formatyn iske qosty.
Múgedektik tobyn belgileý jónindegi qyzmetti alýǵa ótinish berýshi turǵylyqty jerindegi emhanaǵa júginýi, qajetti tekserýden ótýi qajet. Qalǵan úderister aqparattyq júıelerdi ıntegrasııalaý esebinen onyń qatysýynsyz ótedi.
Syrttaı kýálandyrýǵa kóshýdiń nátıjesinde ákimshilik, bıýrokratııalyq kedergiler joıylady. MÁS saraptamalyq sheshimderiniń ashyqtyǵyn qamtamasyz etedi. Múgedektikti belgileý men múgedektigi bar adamdardy áleýmettik qorǵaý sharalaryn anyqtaý qyzmetterin úıden shyqpaı-aq alýǵa múmkindik týady. Kórsetiletin qyzmetti alýshynyń tıisti oryn qyzmetkerimen tikeleı baılanysyn boldyrmaıdy, nátıjesinde sybaılas jemqorlyq táýekeli azaıady.