Búgin Memleket basshysy Qasym-Jomart Toqaev «Altyn sapa» jáne «Paryz» syılyǵynyń laýreattaryn, «Qazaqstannyń úzdik taýary» respýblıkalyq kórme-konkýrsynyń jeńimpazdaryn marapattady. Prezıdent marapat barysynda «Paryz» baıqaýyna qatysýshylar túrli qaıyrymdylyq sharalarǵa 37 mıllıard teńgeden astam qarjy salǵanyn atap ótti, dep jazady Egemen.kz.
«Qazaqta «Jaqsylyq júrgen jerde tapshylyq bolmaıdy» degen sóz bar. Bıylǵy «Paryz» baıqaýyna qatysýshylar túrli qaıyrymdylyq sharalarǵa 37 mıllıard teńgeden astam qarjy salǵan. Bul otandyq bıznestiń qoǵam ıgiligi úshin aıanbaı adal qyzmet etýge daıyn ekendigin kórsetedi.
Osynda otyrǵan ár azamattyń týǵan elge degen yqylas-peıili jas kásipkerlerge úlgi-ónege bolary sózsiz.
Sizderge taǵy da shynaıy rızashylyǵymdy bildiremin! Kásipterińiz alǵa basa bersin! Barshańyzǵa amandyq, tabys tileımin», dedi Qasym-Jomart Toqaev.
Sondaı-aq Memleket basshysy «Altyn sapa» jáne «Paryz» baıqaýlaryna qatysqan kásipkerlerdiń barlyǵyna alǵys aıtyp, laýreattardy marapattady.
Shaǵyn jáne orta bıznes sýbektileri arasynda «Paryz» syılyǵy Soltústik Qazaqstan oblysynyń «Aq-Nıet-Agro» jaýapkershiligi shekteýli seriktestigine tabystaldy. Al iri bıznes ókilderi ishinen Ulytaý oblysyndaǵy «Qazaqmys» korporasııasy laıyq dep tanyldy.
«Altyn sapa» syılyǵyna «Úzdik ındýstrıaldyq joba» atalymy boıynsha «Karlskrona LC AB» (Shymkent qalasy), «Úzdik ınnovasııalyq joba» atalymy boıynsha «AG TECH» (Astana qalasy) kompanııalary ıe boldy.